Суд Заводзкага раёну Менску 27 чэрвеня за адзін дзень разгледзеў крымінальную справу палітвязьня Максіма Урбановіча — малодшага брата байца палка імя Кастуся Каліноўскага Дзяніса Урбановіча.
Прысуд Максіму — 1,5 года пазбаўленьня волі паводле арт. 342 КК (арганізацыя і падрыхтоўка дзеяньняў, што груба парушаюць грамадзкі парадак, або актыўны ўдзел у іх). Яму таксама прызначылі прымусовае лячэньне ад алькагалізму.
2 красавіка ў кватэру, што арандаваў Максім Урбановіч, уварваліся сілавікі. Пасьля ператрусу яго адвезьлі на допыт у КДБ. Спачатку Максіма трымалі ў СІЗА КДБ, а потым перавезьлі ў СІЗА № 1, што ў Калядзічах.
Былы супрацоўнік Дэпартамэнта крымінальнай разьведкі МУС 36-гадовы Аляксандар Кудзевіч асуджаны на 15 гадоў пазбаўленьня волі паводле ч. 3 арт. 361¹ (стварэньне экстрэмісцкага фармаваньня або ўдзел у ім) і ч. 2 арт. 356 (здрада дзяржаве). Падрабязнасьці справы невядомыя.
42-гадовая жыхарка Ждановічаў (Менскі раён) Юлія Каробка асуджаная на невядомы тэрмін абмежаваньня волі без накіраваньня ў папраўчую ўстанову адкрытага тыпу паводле арт. 342 КК (арганізацыя і падрыхтоўка дзеяньняў, што груба парушаюць грамадзкі парадак, або актыўны ўдзел у іх). У Каробкі дзьве дачкі і сын.
53-гадовая спэцыялістка аддзелу продажаў кампаніі «Голдэн Браун» Натальля Нячаева асуджаная паводле арт. 342 КК. Тэрмін і від пакараньня невядомыя.
Напярэдадні ў праваабарончым цэнтры «Вясна» паведамілі, што ў канцы траўня ў Магілёве па «справе Гаюна» асудзілі мясцовага прадпрымальніка, дырэктара адной з рэклямных кампаній Віталя Чавусава.
Паводле інфармацыі «Вясны», яго прызналі вінаватым паводле арт. 361-4 Крымінальнага кодэксу Беларусі (садзейнічаньне экстрэмісцкай дзейнасьці).Віталю Чавусаву прызначылі 4 гады калёніі. Падрабязнасьці справы і рэжым умоваў адбыцьця невядомыя.
За чэрвень, паводле дарадцы дэмакратычнай лідэркі Сьвятланы Ціханоўскай Дзяніса Кучынскага, з палітычных матываў было затрымана 28 чалавек.
Форум