У сацыяльных сетках зьявіліся відэа з выпускнікамі дзявятых клясаў, якія пасьля іспыту ў гісторыі Беларусі рвалі і кідалі ва ўнітаз білеты і дапаможнікі з гісторыі, часта суправаджаючы гэта словамі, якія немагчыма публікаваць.
Трэнд быў апэратыўна перабіты «пакаяльным відэа», на якім двое зьбянтэжаных хлопцаў каюцца ва ўчыненым і ўскладаюць кветкі да манумэнту на плошчы Перамогі ў Менску. Свае прапановы, як перавыхаваць дзевяціклясьнікаў, выказалі і прапагандысты.
Свабода паразмаўляла з гісторыкам, псыхолягам, настаўніцай і вучнямі, якія патлумачылі паводзіны дзяцей і ўладаў.
«Мне здаецца, гэта такая гістэрычная, псыхапатычная рэакцыя на любую форму нонканфармізму. Усё, што не патрапляе пад шаблён, пад стандарт, яно становіцца нагодай для пакараньня, для ўжываньня гвалту», — кажа кандыдат гістарычных навук Павал Церашковіч.
Ён прыгадаў выпадак, калі ў Бярозе перад іспытамі школьнікаў абшуквалі міліцыянты, узброеныя аўтаматамі Калашнікава.
«Гэта публічнае прыніжэньне», — кажа псыхоляг Ганна Матуляк. Гэта форма, якая ніколі не прыводзіць да пераасэнсаваньня свайго ўчынку, чаго б хацелася ўладам. Чалавек ад такога мэтаду ня выправіцца. Ён або ад гэтага сораму згарыць, або трансфармуе гэты сорам у гнеў.
«Страх і запужваньне на дзяцей дзейнічаюць адваротным чынам. Яны ператвараюць гэта ў такую своеасаблівую гульню, каб абараніць сваю псыхіку ад ціску», — кажа настаўніца Тацяна Крапіневіч.
Цалкам размову глядзіце ў нашым відэасюжэце.
Форум