Сястра памерлага ў ЗША Аляксандра Класкоўскага Вольга паведаміла, што сваякі хацелі б яго пахаваць у Беларусі.
«Вельмі хацелася б пахаваць яго ў Беларусі, але ня ведаю, наколькі гэта рэальна», — напісала Вольга Класкоўская.
Сваякі Аляксандра Класкоўскага зьвярнуліся ў Фонд салідарнасьці BySol з просьбай дапамагчы сабраць сродкі на рэпатрыяцыю цела ў Беларусь і іншыя выдаткі, зьвязаныя з пахаваньнем.
У Беларусі блізкіх сваякоў у сям'і не засталося.
Аляксандар Класкоўскі (малодшы) нарадзіўся 26 верасьня 1978 году ў сям’і вядомых беларускіх журналістаў Аляксандра і Людмілы Класкоўскіх.
У 1999 годзе паступіў на службу ў ДАІ Ленінскага раёну Менску, быў інспэктарам ДПС. У 2005 годзе вымушана пакінуў МУС у званьні лейтэнанта міліцыі.
Апрануўшыся ў міліцэйскую форму, браў удзел у акцыі пратэсту ў Менску супраць фальсыфікацыі вынікаў выбараў 19 сьнежня 2010 году. Затрымалі яго ў ноч на 21 сьнежня, абвінавацілі ў арганізацыі масавых беспарадкаў і ўдзеле ў іх.
26 траўня 2011 году судзьдзя Ленінскага раёну Менску Людміла Грачова асудзіла яго на 5 гадоў зьняволеньня ў калёніі ўзмоцненага рэжыму. Адбываў пакараньне ў шклоўскай калёніі № 17. Вызвалены праз памілаваньне.
Пасьля ўзмацненьня рэпрэсіяў у 2020 годзе Аляксандр разам зь сям’ёй быў вымушаны хавацца ад перасьледу ў замежжы. У 2024 годзе эміграваў у ЗША разам з жонкай і трыма дзецьмі.
4 чэрвеня 2025 году Аляксандар раптоўна памёр, прычынай, як мяркуецца, стаў сардэчны прыступ. Цела каля дому знайшлі суседзі, цяпер праводзяць экспэртызу. Аляксандру было 46 гадоў.
Форум