Падаражэе камуналка
З 1 чэрвеня на 10% вырасьце субсыдаваны тарыф на ацяпленьне і падаграваньне вады — да 27,2323 рубля за гігакалёрыю.
Гэта плянавае павышэньне, якое пакуль што адбываецца двойчы на год. З 2026 году цэны будуць пераглядаць удвая часьцей — раз на квартал.
А субсыдаваць камунальныя тарыфы, паводле цяперашніх плянаў ураду, будуць да 2029 году.
Зьменяцца правілы дзяржаўнага падтрыманьня будаўніцтва жытла
Людзям будуць выдаваць крэдыты не на долевае будаўніцтва, а толькі на куплю ўжо гатовых кватэраў у дамах, пабудаваных — што важна — на дзяржаўную замову. Індывідуальных дамоў гэта ня тычыцца.
Субсыдыі на сплату запазычанасьці і адсоткаў за камэрцыйныя крэдыты заменяць ільготнымі крэдытамі.
Для шматдзетных сем’яў і жыхароў невялікіх (да 20 тысяч) гарадоў і вёсак — асобныя правілы.
Зьявіцца збор за адкрыцьцё валютных рахункаў
«Беларусбанк» з 2 чэрвеня будзе браць плату за адкрыцьцё валютных рахункаў у далярах і эўра: 100 рублёў зь беларусаў і 200 — з іншаземцаў.
Апошнія дні, каб завесьці базавы рахунак
Для большасьці людзей пэнсіі і сацыяльныя выплаты з 1 ліпеня будуць пералічваць толькі на базавы рахунак. Яго лепш адкрыць да 20 чэрвеня, каб не сутыкнуцца з прыпыненьнем выплатаў.
Беларускія дзюдаісты змогуць выступаць пад чырвона-зялёным сьцягам
Міжнародная фэдэрацыя дзюдо дазволіла беларускім дзюдаістам з 1 чэрвеня выступаць на міжнародных спаборніцтвах пад дзяржаўнымі сымбалямі. Фэдэрацыя дзюдо Ўкраіны выступіла з пратэстам.
Не падаражэюць цыгарэты
Тытунёвыя вырабы ў Беларусі сёлета даражэлі ў першы дзень кожнага месяца. Але 1 чэрвеня стане выняткам — цэны ня зьменяцца.
Беларускім студэнтам стане цяжэй паступіць вучыцца ў Польшчу
З 1 чэрвеня ў Польшчы ўзмацняюцца абмежаваньні для замежных студэнтаў, у тым ліку беларускіх. Ім давядзецца пацьвердзіць веданьне мовы навучаньня яшчэ да паступленьня. Унівэрсытэтам забароняць прымаць больш за 50% студэнтаў-іншаземцаў, што можа павялічыць конкурс на месца. А за пропускі можна будзе страціць дазвол на знаходжаньне ў краіне.
Форум