У суботу, 26 красавіка, у порце на поўдні Ірана адбыўся магутны выбух і пажар, якія, як мяркуецца, зьвязаныя з пастаўкай хімічнага інгрэдыенту, які выкарыстоўваецца для вырабу ракетнага паліва. У выніку чаго загінулі пяць чалавек і больш за 700 атрымалі раненьні, паведамляе Associated Press.
Як піша Tasnim, выбухная хваля была такой моцнай, што сур’ёзна пашкодзіла большасьць будынкаў у порце, а таксама аўтамабілі.
Дакладнай інфармацыі пра тое, што стала прычынай інцыдэнту, пакуль няма. Tasnim піша, што па невядомай прычыне ўзарваўся паліўны бак. Агенцтва Reuters са спасылкай на мясцовыя ўлады пісала, што ў порце ўзарваліся некалькі кантэйнэраў.
Раней у порт паступіла хімічнае рэчыва для ракетнага паліва, сьцьвярджае AP са спасылкай на прыватную ахоўную фірму Ambrey. Нібыта паліва павінна было быць выкарыстана для папаўненьня ракетных запасаў Ірана, якія былі вычарпаныя ў выніку яго прамых нападаў на Ізраіль падчас вайны з ХАМАС у сэктары Газа.
Праца порта часова прыпыненая для ліквідацыі наступстваў. Мытня порта заявіла, што грузавікі эвакуююцца з гэтага раёна і што на кантэйнэрнай пляцоўцы, дзе адбыўся выбух, верагодна, знаходзіліся «небясьпечныя грузы і хімікаты». Дзяржаўныя СМІ сьцьвярджаюць, што прычынай выбуху стала «нядбайства пры абыходжаньні з лёгкаўзгаральнымі матэрыяламі».
У суботу ўвечары іранскае дзяржаўнае інфармацыйнае агенцтва IRNA паведаміла, што мытная адміністрацыя Ірана назвала прычынай выбуху «запасы небясьпечных тавараў і хімічных матэрыялаў, якія захоўваюцца ў портавай зоне», не ўдаючыся ў падрабязнасьці.
Форум