Дакумэнт апублікавалі 24 красавіка на Нацыянальным прававым інтэрнэт-партале.
Згодна з пастановай, мінімальны кошт дазволу на здабычу мядзьведзя:
- 500 рублёў — для грамадзян Беларусі або іншых краін ЭАЭС;
- 1000 рублёў — для грамадзян іншых краін.
За дазвол на паляваньне на рысь давядзецца заплаціць:
- 200 рублёў — для грамадзян Беларусі і краін ЕАЭС;
- 500 рублёў — для астатніх замежнікаў.
Акрамя гэтага, паляўнічыя павінны набыць адмысловую паляўнічую пуцёўку, яна каштуе сама меней 5 рублёў на чалавека. Безь яе дазвол ня дзейнічае.
Новыя правілы паляваньня набываюць моц з 21 траўня 2025 году.
Рысь і мядзьведзь уключаныя ў Чырвоную кнігу Беларусі і застаюцца ахоўнымі відамі. Разам з тым, Міністэрства прыродных рэсурсаў і аховы навакольля Беларусі сваёй пастановай № 10 ад 14 сакавіка 2025 году панізіла іх ахоўны статус.
Да найменш ахоўванай чацьвёртай ступені панізілі статус бурага мядзьведзя (быў у першай, найвышэйшай для аховы), барсука і рысі (абодва віды былі ў другой катэгорыі), а таксама зубра (раней быў у трэцяй катэгорыі).
Зьмяненьне іх статусу некалькі гадоў лябіяваў былы кіраўнік МУС Ігар Шуневіч, які стаў старшынёй Беларускага таварыства паляўнічых і рыбаловаў.
У Беларусі колькасьць бурага мядзьведзя, паводле розных ацэнак, складае ад 500 да 900 асобін. Колькасьць рысяў летась ацэньвалі ў 1600 асобін.
У лістападзе 2024 году ўказам № 420 у Беларусі дазволілі паляваньне на мядзьведзя і рысь у «асаблівым рэжыме, які дае магчымасьць кантралявана рэгуляваць іх колькасьць, на падставе плянаў кіраваньня папуляцыямі, якія распрацоўвае Нацыянальная акадэмія навук Беларусі».
Форум