У выніку расейскай атакі на Харкаў, паводле апошніх зьвестак, загінулі пяць чалавек, 32 чалавекі атрымалі раненьні, напісаў кіраўнік Харкаўскай абласной вайсковай адміністрацыі Алег Сінягубаў.
У Дзяржаўнай службе надзвычайных сытуацыяў Украіны ўдакладнілі, што пацярпелых пабольшала да 35 чалавек. Выратавальныя працы працягваюцца.
Паводле мясцовых уладаў, у ноч на 4 красавіка ў Харкаве прагрымелі выбухі — усяго за 40 хвілінаў расейскія войскі нанесьлі ня менш за 14 удараў. Першапачаткова ўдары былі зафіксаваныя ў пяці розных месцах Кіеўскага раёну Харкава. Таксама паведамлялі, што бесьпілётнік трапіў у жылы дом у Новабаварскім раёне.
У Дніпры пацярпелі тры чалавекі, жанчыну 66 гадоў шпіталізавалі ў стане сярэдняй цяжкасьці. Узгараньні былі ў жылым доме і адміністрацыйным будынку, паведаміў кіраўнік абласной вайсковай адміністрацыі Сяргей Лысак. Таксама ў Дніпры пашкоджаныя аб’ект інфраструктуры, 2 адміністрацыйныя будынкі, прыватны і гасьцявы дамы, гаспадарчая пабудова, дом, які не эксплюатаваўся, аўтамабіль, газаправод і лінія электраперадачы.
У Браварскім раёне Кіеўскай вобласьці ў выніку расейскага нападу пацярпелі два чалавекі. На паркоўцы ўспыхнулі два грузавыя і два легкавыя аўтамабілі, яшчэ 19 транспартных сродкаў пашкоджаныя. Таксама загарэўся аўтасалён.
У Запароскім раёне ў выніку атакі пацярпеў 63-гадовы мужчына, загарэлася крама плошчай 100 кв. м. Выбуховай хваляй пашкоджаныя суседнія дамы і аўтамабілі, паведаміла Дзяржаўная служба надзвычайных сытуацыяў Украіны.
Агулам, паводле зьвестак Паветраных сілаў УСУ, за ноч расейскія вайскоўцы выпусьцілі па Ўкраіне 78 бесьпілётнікаў, зьбіць удалося 42 зь іх, яшчэ 22 дроны лякацыйна страчаныя.
У папярэднюю ноч расейскія войскі атакавалі Ўкраіну 39 бесьпілётнікамі тыпу «Шахед» і дронамі-імітатарамі. Ад атакі тады пацярпелі Харкаўшчына, Данеччына і Днепрапятроўшчына.
У выніку расейскага нападу на Крывы Рог загінулі 4 чалавекі, пацярпелі яшчэ 17 чалавек, удакладніў колькасьць пацярпелых раніцай 3 красавіка старшыня Днепрапятроўскай абласной вайсковай адміністрацыі Сяргей Лысак.
Расейскія вайскоўцы рэгулярна атакуюць украінскія рэгіёны рознымі відамі зброі — ударнымі БПЛА, ракетамі, зэнітнымі ракетамі.
Кіраўніцтва Расеі адмаўляе, што расейская армія ў ходзе поўнамаштабнай вайны наносіць удары па цывільнай інфраструктуры гарадоў і вёсак Украіны, у выніку чаго гіне мірнае насельніцтва і разбураюцца бальніцы, школы, дзіцячыя садкі, аб’екты энэрга- і водазабесьпячэньня.
Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы Расеі і падкрэсьліваюць, што яны маюць мэтанакіраваны характар.
У ААН змаглі пацьвердзіць, што з пачатку году ва Ўкраіне загінулі 413 мірных жыхароў, больш за 2 тысячы атрымалі раненьні — за першыя тры месяцы 2025 году колькасьць ахвяраў вырасла на 30% у параўнаньні з аналягічным пэрыядам летась.
Форум