Палітзьняволеная Вікторыя Кульша мела выйсьці на волю ў красавіку 2025 году па заканчэньні тэрміну, але днямі яе перавялі ў гомельскі СІЗА-3 у рамках чацьвёртай крымінальнай справы паводле ч. 1 арт. 411 Крымінальнага кодэксу (злоснае непадпарадкаваньне законным патрабаваньням адміністрацыі калёніі), паведамляе ініцыятыва DissidentBY.
Раней Вікторыі Кульшы ўжо тройчы прызначалі пазбаўленьне волі па гэтым артыкуле. Агульны тэрмін зьняволеньня Вікторыі цяпер складае пяць гадоў і шэсьць месяцаў, піша праваабарончы цэнтар «Вясна».
Перасьлед Вікторыі Кульша
Інжынэрку па ахове працы Вікторыю Кульшу затрымалі 4 лістапада 2020 году за тое, што яна адміністравала тэлеграм-канал і чат «Кіроўцы 97%». Яе абвінавацілі паводле ч. 1 і ч. 2 арт. 342 Крымінальнага кодэксу Беларусі (актыўны ўдзел у дзеяньнях, што груба парушаюць грамадзкі парадак). У лютым 2021 году Вікторыю асудзілі да двух з паловай гадоў калёніі і накіравалі адбываць тэрмін у гомельскую жаночую калёнію № 4.
Пазьней Вікторыю Кульшу тройчы судзілі паводле ч. 1 арт. 411 КК і прызначылі ёй агулам тры гады пазбаўленьня волі.
У зьняволенлні яе неаднаразова зьмяшчалі ў штрафны ізалятар (ШЫЗА) і памяшканьне камэрнага тыпу (ПКТ). Паводле інфармацыі праваабаронцаў, у зарэчанскай калёніі № 24 адзін з наглядчыкаў душыў Вікторыю локцем, стоячы ззаду, а таксама цягаў яе па камэры. Праз галадоўкі ў яе двойчы здараўся сардэчны прыступ.
Форум