Расейскія войскі ў ноч на 3 красавіка атакавалі Ўкраіну 39 бесьпілётнікамі тыпу «Шахед» і дронамі-імітатарамі, паведамляе камандаваньне Паветраных сілаў Узброеных сілаў Украіны. Кіраўнікі рэгіёнаў паведамляюць пра наступствы расейскіх абстрэлаў.
«На 09.00 пацьверджана зьбіцьцё 28 ударных БПЛА тыпу Shahed (бесьпілётнікаў іншых тыпаў) на поўначы і ўсходзе краіны. 7 варожых бесьпілётнікаў-імітатараў — лякацыйна страчаныя (без нэгатыўных наступстваў)», — гаворыцца ў паведамленьні.
Камандаваньне ўдакладняе, што ад атакі пацярпелі Харкаўшчына, Данеччына і Днепрапятроўшчына.
За мінулы дзень на фронце зафіксавалі 216 баявых сутыкненьняў, паведамляе Генэральны штаб УСУ ў ранішняй зводцы. Паводле Генэральнага штабу, больш за ўсё расейскіх нападаў было на Пакроўскім кірунку — 80. На Ліманскім, Тарэцкім і Курскім кірунках сілы Расеі атакавалі больш за 20 разоў у кожным кірунку. Таксама баі працягваюцца на Харкаўскім, Купянскім, Северскім, Краматорскім, Навапаўлаўскім, Гуляйпольскім, Арэхаўскім, Прыдняпроўскім кірунках.
У выніку ўчорашняга расейскага нападу на Крывы Рог загінулі 4 чалавекі, пацярпелі яшчэ 17 чалавек, удакладніў колькасьць пацярпелых раніцай 3 красавіка старшыня Днепрапятроўскай абласной вайсковай адміністрацыі Сяргей Лысак. Паводле яго зьвестак, у выніку расейскага ўдару ў горадзе пашкоджаныя дзевяць шматпавярховікаў, аўтамабілі і гаражы, АЗС, адміністрацыйныя будынкі, пошта.
Таксама за дзень расейскія войскі абстралялі паселішчы ў трох раёнах Данецкай вобласьці, ёсьць загінулы і параненыя, паведаміў старшыня абласной вайсковай адміністрацыі Вадзім Філашкін раніцай 3 красавіка.
«У Дабрапольлі паранены чалавек, пашкоджаны адміністрацыйны будынак і нежылое памяшканьне. У Пакроўску 1 чалавек загінуў і 6 параненыя, пашкоджаныя 5 дамоў; у Радзінскім пашкоджаны дом», — заявіў ён.
Таксама ў выніку атак пашкоджаныя дамы ў Торскім і Канстанцінаўцы Краматорскага раёну, а таксама ў Сіверску Бахмуцкага раёну.
Паводле зьвестак абласных уладаў, напярэдадні зь лініі фронту эвакуавалі 175 чалавек, у тым ліку 29 дзяцей. Таксама пад расейскія абстрэлы трапілі 25 паселішчаў Херсонскай вобласьці, у выніку ёсьць параненыя, заявіў кіраўнік рэгіёну Аляксандар Пракудзін:
«Расейскія вайскоўцы білі па крытычнай інфраструктуры; па жылых кварталах паселішчаў вобласьці, у тым ліку пашкодзілі шматпавярховік і 8 прыватных дамоў. Таксама акупанты зьнявечылі краму. З прычыны расейскай агрэсіі 4 чалавекі атрымалі раненьні», — паведаміў ён.
Пра абстрэлы і пашкоджаньні паведамлялі таксама кіраўнікі Мікалаеўскай і Запароскай вобласьцяў — паводле іхных зьвестак, ніхто з цывільных за апошнія содні не пацярпеў.
У выніку адной з учорашніх расейскіх атак на Харкаў пацярпелі пяць чалавек.
- Расейскія вайскоўцы рэгулярна з розных відаў узбраеньня атакуюць украінскія рэгіёны. Кіраўніцтва Расеі адмаўляе, што расейскае войска падчас поўнамаштабнай вайны наносіць мэтанакіраваныя ўдары па цывільнай інфраструктуры гарадоў і вёсак Украіны, забіваючы мірнае насельніцтва і разбураючы лякарні, школы, дзіцячыя сады, аб’екты энэргетыкі і водазабесьпячэньня. Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы Расеі і падкрэсьліваюць, што яны маюць мэтанакіраваны характар.
- У ААН змаглі пацьвердзіць, што з пачатку году ва Ўкраіне загінулі 413 цывільных асобаў, а больш за 2000 параненыя — у першыя тры месяцы 2025 году колькасьць ахвяраў узрасла на 30% у параўнаньні з аналягічным пэрыядам летась.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум