Беларускія банкі ў красавіку ўводзяць зьмены для сваіх кліентаў. Выданьні «Люстэрка» і 1prof.by склалі падборку гэтых новаўвядзеньняў, пераказваем.
- «Цэптэр Банк» з 2 красавіка значна падвышае працэнтную стаўку па крэдыце «Крэдыт mini»: яна складзе 15,99% гадавых. Як паведамілі ў кантакт-цэнтры банку, яшчэ 1 красавіка стаўка была на ўзроўні 9%.
- «Парытэтбанк» абвясьціў, што з 2 красавіка ўнясе зьмены па некаторых крэдытах. Так, з гэтай даты часова прыпыняць афармленьне пазык «iParitet # mini» і «Крэдыт на набыцьцё аўтамабіля». Таксама банк спыніць прыём заявак на «Крэдыт на спажывецкія патрэбы тэрмінам на 10 гадоў». Што тычыцца пазыкі «Спажывецкі крэдыт #Будуць грошы 2.0», то максымальны тэрмін, на які яго можна ўзяць, зьнізяць да 84 месяцаў (цяпер магчыма аформіць да 120 месяцаў).
- «Тэхнабанк» з 1 красавіка перагледзеў камісію за пераводы ў далярах у іншыя фінансавыя ўстановы: яна складае 30 даляраў + 1% ад сумы пераводу, але ня больш за 350 даляраў. Камісію могуць спаганяць у беларускіх рублях па курсе Нацбанку Беларусі на дзень аплаты, удакладнілі ў банку.
- «Прыёрбанк» з 1 красавіка ўвёў штомесячную плату за сэрвіснае абслугоўваньне валютных рахункаў кліентаў, якія трымаюць у банку буйныя сумы грошай. Новы збор будзе тычыцца сродкаў, якія захоўваюцца ў далярах, эўра, злотых, фунтах стэрлінгаў, швайцарскіх франках і швэдзкіх кронах. Мінімальны парог, зь якога бяруць плату, складае 30 тысяч даляраў — у гэтым выпадку камісія складзе 500 рублёў за месяц. Для некаторых кліентаў яна будзе складаць 12 000 рублёў у месяц.
- «Белаграпрамбанк» 31 сакавіка паведаміў, што часова прыпыніў магчымасьць падаць заяўку на крэдыт «Лёгкія пакупкі». Таксама ў банку паведамілі, што з 14 красавіка 2025 году падымуць памер камісіі за прыём інкаса банкнот у далярах, эўра або расейскіх рублях, «якія выклікаюць сумнеў у плацежнасьці». Цяпер тарыф складае 4% (мінімум 4 даляры), з 14 красавіка ён вырасьце да 5% (мінімум 25 беларускіх рублёў).
- Беларускі банк «ВТБ» з 24 красавіка павысіць тарыфы за пераводы зь бягучых рахункаў фізычных асобаў на рахункі, адкрытыя ў банках-рэзыдэнтах і нерэзыдэнтах: зьмены закрануць пераводы ў беларускіх рублях, далярах, эўра і юанях. За перавод у беларускія банкі камісія складзе 2% ад сумы, за перавод у замежныя — 2,5%. Тарыфы за перавод у расейскай валюце ня зьменяцца. З 26 красавіка «ВТБ» таксама ўнясе зьмены ў рэдакцыі дамоваў бягучых рахункаў і публічных афэртаў на адкрыцьцё такіх рахункаў у беларускіх і расейскіх рублях, далярах ЗША, эўра і юанях: карэкціроўкі закранулі абавязкі кліентаў апавяшчаць банк не пазьней за 10 працоўных дзён пра зьмену сваіх ідэнтыфікацыйных зьвестак. З 27 красавіка банк падоўжыць тэрмін дзеяньня некаторых сваіх картак на 12 месяцаў без правядзеньня іх фізычнай замены, сьпіс такіх картак можна паглядзець на сайце банка.
- «Беларусбанк» з 30 красавіка ўвядзе зьмены, якія датычацца базавых разьліковых рахункаў. Такія рахункі павінны завесьці да 1 ліпеня 2025 году ўсе беларусы, якія атрымліваюць пэнсіі праз банкі, каб атрымліваць на іх пэнсію. Таксама «Беларусбанк» аб’явіў, што яго кліенты да 30 красавіка могуць аформіць картку Visa Gold клюбу «Лэдзі» па зьніжаным кошце.
- «Белгазпрамбанк» з 1 красавіка ўнёс зьмены для камісіі за паслугі банкаўскага захоўваньня, гэта значыць па дэпазытарных ячэйках.
- У «БСБ Банка» з 1 красавіка зьявіліся новаўвядзеньні ва ўмовах доступу ў бізнэс-залі аэрапортаў па прэміяльных картах Visa Platinum і Visa Infinite. Яны датычацца колькасьці наведваньняў: па Visa Infinite стала безьлімітным, а па Visa Platinum застаецца два бясплатныя наведваньні ў год.
- «Белінвэстбанк» увёў новую функцыю «Аплаці-Бізнэс» — разьлікі для нерэзыдэнтаў па QR-кодзе, з дапамогай якой расейскія бізнэсоўцы і турысты змогуць расплаціцца ў кавярні або краме з дапамогай мабільнай праграмы расейскага «Сбербанка».
- «Нэа Банк Азія» паведаміў, што з 30 красавіка ўносіць зьмены ў пералік узнагародаў за безнаяўнае залічэньне грошай у валюце (за выключэньнем валют Расеі і Казахстану) на рахункі фізычных асобаў: плата за безнаяўнае залічэньне грошай на рахункі фізычных асобаў складзе 2,5% ад сумы пераводу.
Форум