«Паводле папярэдніх ацэнак, з 2014 году праз шэрагі Ўзброеных сіл Украіны і добраахвотніцкіх фармаваньняў прайшло больш за 1000 беларускіх грамадзян, многія зь якіх працягваюць служыць у складзе Палка Каліноўскага», — гаворыцца ў распаўсюджаным 1 красавіка паведамленьні Аб’яднанага пераходнага кабінэту па выніках яго пасяджэньня.
Адзначаецца, што падчас сустрэчы надалі асобную ўвагу «ўнёску беларускіх добраахвотнікаў, якія змагаюцца на баку Ўкраіны супраць расейскай агрэсіі».
АПК падкрэсьлівае, што «падтрымка гэтых людзей зьяўляецца маральным абавязкам дэмакратычных сілаў, а іх дзейнасьць набліжае перамогу ня толькі Ўкраіны, але і свабоднай Беларусі».
Таксама ў АПК заявілі пра падтрымку міратворчых намаганьняў эўрапейскіх дзяржаваў, уключаючы ініцыятывы, што прадугледжваюць стварэньне міжнароднага мэханізму бясьпекі ва Ўкраіне, умацаваньне ўсходняй мяжы ЭЗ і NATO, забесьпячэньне прававой адказнасьці Расеі за агрэсію і ваенныя злачынствы.
- Батальён імя Кастуся Каліноўскага быў створаны 9 сакавіка 2022 году. 26 сакавіка таго ж году ён увайшоў у склад Узброеных сілаў Украіны, а 21 траўня ён быў трансфармаваны ў полк імя Кастуся Каліноўскага.
- У Беларусі па факце стварэньня палка Каліноўскага раней завялі крымінальную справу, яго прызналі «экстрэмісцкім фармаваньнем». Любая дапамога палку ці нават намер дапамагчы, а таксама жаданьне ўступіць у полк жорстка перасьледуюцца рэдымам Лукашэнкі.
- 25 верасьня 2024 году Вярхоўны суд Беларусі прызнаў полк Каліноўскага «тэрарыстычнай арганізацыяй». Згодна з Крымінальным кодэксам Беларусі, «арганізацыя дзейнасьці тэрарыстычнай арганізацыі» (п.1 арт. 290-5 КК) караецца пазбаўленьнем волі на тэрмін ад 10 да 15 гадоў са штрафам, удзел у «тэрарыстычнай арганізацыі» (п.2 арт. 290-5 КК) — пазбаўленьнем волі на тэрмін ад 8 да 12 гадоў са штрафам. У Палку ў адказ на гэта заявілі, што прызнаюць «тэрарыстычнай арганізацыяй» рэжым Лукашэнкі.
- Ад пачатку поўнамаштабнага ўварваньня Расеі ва Ўкраіну на фронце загінулі каля 70 беларускіх добраахвотнікаў, якія ваявалі на баку Кіева.
Форум