Па стане на 09:00 пацьверджана зьнішчэньне 41 бесьпілётніка на поўначы, поўдні і ўсходзе Ўкраіны. Яшчэ 20 расейскіх дронаў-імітатараў былі лякацыйна страчаны (без нэгатыўных наступстваў), удакладнілі ў Паветраных сілах УСУ.
Агулам у ноч на 2 красавіка Расея атакавала Ўкраіну 74 ударнымі дронамі тыпу Shahed і бесьпілётнікамі-імітатарамі розных тыпаў, гаворыцца ў паведамленьні. У выніку расейскай атакі пацярпелі Харкаўская, Данецкая і Адэская вобласьці.
У выніку расейскага нападу па Харкаве, паводле апошніх зьвестак, пацярпелі дзевяць чалавек, паведамілі ў Харкаўскай абласной пракуратуры. Сярод пацярпелых ёсьць дзеці: 9-месячнае немаўля, 7-гадовы хлопчык і 16-гадовая дзяўчына. Паводле пракуратуры, большасьць трапляньняў дронаў зафіксавалі па прамысловай зоне Харкава, там пачаліся пажары. Пашкоджаныя будынкі і склады грамадзянскіх прадпрыемстваў, больш за 10 прыватных жылых дамоў, гаспадарчыя пабудовы, аўтамабілі. На месцы трапляньня праваахоўнікі канфіскавалі часткі бесьпілётніка «Герань-2».
Паводле мэра Харкава Ігара Церахава, Расея нанесла па горадзе 15 удараў бесьпілётнікамі.
Прэзыдэнт Украіны Ўладзімір Зяленскі, камэнтуючы начную атаку Расеі, заявіў, што ў выніку атак ёсьць чарговыя пашкоджаньні энэргетычных аб’ектаў. Паводле яго, у Сумскай вобласьці бесьпілётнік FPV трапіў у падстанцыю, а ў Нікапалі Дняпроўскай вобласьці артылерыйскі ўдар пашкодзіў лінію электраперадач. У выніку каля 4000 абанэнтаў у двух рэгіёнах засталіся безь сьвятла.
Зяленскі дадаў, што працягваюцца і бамбардаваньні расейскай авіяцыі — толькі супраць Сумскай вобласьці за мінулыя содні і сёньня раніцай войскі Расеі ўжылі амаль 50 кіраваных авіябомбаў. Паводле прэзыдэнта Ўкраіны, такая сыстэматычнасьць і пастаяннасьць расейскіх удараў «адназначна сьведчыць пра няўвагу дыпляматычных намаганьняў партнэраў».
«Пуцін ня хоча забясьпечыць нават частковае спыненьне агню. Неабходны новы і адчувальны ціск на Расею, каб накіраваць гэтую вайну на курс да завяршэньня. Ня варта чакаць, што 11 красавіка споўніцца ўжо месяц расейскаму „не“ спыніць агонь у адказ на амэрыканскую прапанову. Дзейнічаць трэба як мага хутчэй», — падкрэсліў Зяленскі.
За дзень ва Ўкраіне ад расейскіх атак загінулі 4 чалавекі, яшчэ 16 параненыя
Агулам у выніку расейскай агрэсіі за мінулыя содні загінулі 4 чалавекі ў чатырох абласьцях Украіны, яшчэ 16 параненыя, паведамляюць мясцовыя абласныя ўлады.
На Данеччыне з прычыны расейскіх атак за мінулыя содні загінулі два чалавекі (у Пакроўску і Чырвоным Лімане), яшчэ трое параненыя, паведаміў старшыня Данецкай абласной ваеннай адміністрацыі Вадзім Філашкін.
У Херсонскай вобласьці загінуў адзін чалавек, яшчэ дзевяць параненыя. Паводле мясцовых уладаў, за мінулыя суткі расейцы атакавалі 38 населеных пунктаў вобласьці, у тым ліку Херсон, сярод іншага, яны нанеслі ўдары па крытычнай інфраструктуры.
У Малакацярынаўцы Запароскай вобласьці ад расейскага ўдару загінуў адзін чалавек, яшчэ двое параненыя, паведаміў старшыня абласной ваеннай адміністрацыі Іван Фёдараў. Агулам за содні Расея нанесла 459 удараў па 9 населеных пунктах вобласьці.
На Днепрапятроўшчыне, паводле мясцовых уладаў, расейцы атакавалі дронамі і артылерыяй Нікапольшчыну. Як паведаміў кіраўнік абласной адміністрацыі Сяргей Лысак, пацярпелі тры чалавекі — 14-гадовы хлопчык і 65-гадовая жанчына будуць лячыцца амбуляторна, жанчына 37 гадоў шпіталізаваная ў стане сярэдняй цяжкасьці.
- Расейскія вайскоўцы рэгулярна з розных відаў узбраеньня атакуюць украінскія рэгіёны. Кіраўніцтва Расеі адмаўляе, што расейскае войска падчас поўнамаштабнай вайны наносіць мэтанакіраваныя ўдары па грамадзянскай інфраструктуры гарадоў і вёсак Украіны, забіваючы цывільнае насельніцтва і разбураючы бальніцы, школы, дзіцячыя сады, аб’екты энэргетыкі і водазабесьпячэньня. Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы Расеі і падкрэсьліваюць, што яны маюць мэтанакіраваны характар.
Форум