Лінкі ўнівэрсальнага доступу

Улады Беларусі панізілі ахоўны статус зуброў, мядзьведзяў, рысяў і барсукоў


Буры мядзьведзь, ілюстрацыйнае фота
Буры мядзьведзь, ілюстрацыйнае фота

У Беларусі ўдакладнілі пералік жывёл і расьлін, якія ўваходзяць у Чырвоную кнігу.

Міністэрства прыродных рэсурсаў і аховы навакольля Беларусі сваёй пастановай № 10 ад 14 сакавіка зацьвердзіла пералікі жывёл і расьлін, якія маюць статус рэдкіх або знаходзяцца пад пагрозай зьнікненьня.

Як вынікае з апублікаванай на Нацыянальным праўным інтэрнэт-партале Беларусі пастановы, у Чырвоную кнігу Беларусі ўваходзяць 213 відаў дзікіх жывёл і 310 расьлін. Дагэтуль статус ахоўных мелі 202 віды жывёл і 303 расьлін.

У Чырвоную кнігу дадалі такія віды, як звычайная туркаўка, касматаногі сыч, конь Пржавальскага, блакітніца арыён, шаўкапрад дубовы цёмнакрылы.

У той жа час да найменш ахоўванай чацьвёртай ступені панізілі статус зубра (раней быў у трэцяй катэгорыі), бурага мядзьведзя (быў у першай, найвышэйшай для аховы), барсука і рысі (абодва віды былі ў другой катэгорыі).

З трэцяй да першай павысілі катэгорыю аховы звычайнага хамяка, з чацьвёртай да трэцяй — шэрага вушана.

Уключылі ў Чырвоную кнігу зь першай катэгорыяй аховы гіганцкую вячэрніцу (від кажаноў. — РС), унікальнае буйное паселішча якой нядаўна знайшлі ў Жыткавіцкім раёне Гомельскай вобласьці.

Што да птушак, з Чырвонай кнігі выключылі аўдотку як від, які ўжо не жыве на тэрыторыі Беларусі (раней фіксаваўся на тэрыторыі Брагінскага і Хвойніцкага раёнаў, зьнік таксама на тэрыторыі Паўночнай Украіны).

Першая катэгорыя нацыянальнай прыродаахоўнай значнасьці надаецца для дзікіх жывёл і дзікарослых расьлін з найвышэйшай рызыкай зьнікненьня, чацьвёртая — для тых, колькасьць якіх «схільная да ваганьняў», але не патрабуе асаблівых захадаў для захаваньня.

19 кастрычніка 2022 году старшыня Беларускага таварыства паляўнічых і рыбакоў, былы міністар унутраных справаў Ігар Шуневіч выказаў думку, што «з гледзішча прыродаахоўнай дзейнасьці Чырвоная кніга — рудымэнтарны інструмэнт».

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.

Ігар Лосік Кацярына Андрэева Ірына Слаўнікава Марына Золатава
XS
SM
MD
LG