Плошча марскога лёду дасягнула мінімуму ў гісторыі назіраньняў, вынікае са зьвестак Нацыянальнага цэнтру па сьнезе і лёдзе ЗША.
На 16 лютага сукупная плошча марскога лёду ў Арктыцы і Антарктыдзе склала 15,86 мільёна квадратных кілямэтраў. Папярэдні мінімум на гэтую дату быў зафіксаваны два гады таму — 16,08 мільёна квадратных кілямэтраў.
На думку экспэртаў, зь якімі паразмаўляла ВВС, ледзяное покрыва становіцца меншым з прычыны пацяпленьня паветра і вады. Таксама яго разбурэньню спрыяюць штормы, уплыў якіх узмацняецца па меры вытанчэньня лёду.
Скарачэньне марскога лёду на палюсах уплывае на жыцьцё жывёлаў: пінгвінам ён неабходны для размнажэньня, а белым мядзьведзям — для паляваньня. Акрамя таго, раставаньне льдоў, якія адлюстроўваюць сонечнае сьвятло, спрыяе далейшаму награваньню плянэты — і павелічэньню колькасьці зьвязаных зь ім катаклізмаў.
Паводле зьвестак эўрапейскага кліматычнага цэнтру Copernicus, 2024 год стаў самым гарачым за 175 гадоў назіраньняў. На Зямлі стала на 0,72°C цяплей, чым у сярэднім за 1991-2020 гады, і на 1,6°C — чым у даіндустрыяльным пэрыядзе. Такім чынам, леташняе пацяпленьне ўпершыню перавысіла значэньне ў 1,5°C, якое навукоўцы лічаць крытычным.
Бягучы год працягвае біць рэкорды. Студзень ужо стаў самым цёплым у гісторыі назіраньняў, перавысіўшы даіндустрыяльную тэмпэратуру на 1,75°C.
Форум