Грамадзянін Беларусі спрабаваў праз суд ва Ўкраіне пацьвердзіць факты жыхарства ў 1918 годзе сваіх дзеда і бабы на тэрыторыі Ўкраінскай Народнай Рэспублікі і Ўкраінскай Дзяржавы, каб на падставе гэтага атрымаць грамадзянства цяперашняй Украіны.
Як стала вядома Свабодзе, у заяве ў суд беларус паведаміў, што яго дзед нарадзіўся ў вёсцы Плотніца Пінскага павету (цяпер Столінскі раён Берасьцейскай вобласьці ў Беларусі. — РС), а баба — у вёсцы Відзібор. Як вынікала зь ліста, падрыхтаванага Інстытутам гісторыі Нацыянальнай акадэміі навук Украіны, паселішчы Відзібор і Плотніца Столінскай воласьці Пінскага павету сапраўды ўваходзілі ў склад Украінскай Народнай Рэспублікі згодна зь Берасьцейскай мірнай дамовай і законам аб падзеле Ўкраіны на землі ад 6 сакавіка 1918 году, а ў красавіку–сьнежні 1918 году — у склад Украінскай Дзяржавы.
У той жа час грамадзянін Беларусі ня змог даказаць у судзе, што ягоныя сваякі стала жылі на тэрыторыі гэтых паселішчаў, бо, на думку судзьдзяў, «належных і дапушчальных доказаў сталага жыхарства дзеда і бабы на тэрыторыі УНР і Ўкраінскай Дзяржавы заяўнік не падаў».
Пры гэтым у судовым рашэньні адзначаецца, што суд таксама атрымаў даведку, датаваную 27 студзеня 1966 году, якую выдалі ў Сьвята-Ўзьнясенскай царкве, што дзед заяўніка з 12 жніўня 1946 году да 5 лютага 1955 году працаваў ахоўнікам і прыбіральнікам царквы, якая адносілася да Столінскага прыходу Сьвята-Міхайлаўскай царквы ў вёсцы Відзібор.
У працэсе разгляду заявы суд дапытаў грамадзяніна Беларусі і ягоную маці, але палічыў, што іхныя паказаньні ня могуць лічыцца доказамі, бо яны абодва не былі сьведкамі падзеяў.
Апэляцыйны суд пацьвердзіў рашэньне суду першай інстанцыі ў адмове задавальненьня заявы.
Згодна з украінскім заканадаўствам, грамадзянін Беларусі можа абскардзіць адмову ў касацыйным парадку.
Украінскае заканадаўства прадугледжвае некалькі падставаў для атрыманьня іншаземцамі грамадзянства Ўкраіны, у тым ліку жыхарства продкаў на тэрыторыі Ўкраінскай Народнай Рэспублікі і Ўкраінскай Дзяржавы, бо ў Канстытуцыі краіны вызначана, што Ўкраіна ёсьць праванаступніцай УНР, Заходнеўкраінскай Народнай Рэспублікі, Украінскай Дзяржавы і Ўкраінскай Савецкай Сацыялістычнай Рэспублікі.
Згодна з законам аб грамадзянстве, прэтэндэнт павінен даказаць, што ягоныя продкі стала жылі на гэтых тэрыторыях.
Форум