Апошнія гады жыцьця Аляксей Навальны правёў у расейскіх калёніях у цяжкіх умовах. Яго 27 разоў адпраўлялі ў ШЫЗА за любыя «правіны»: «ня так назваўся», «павольна выконваў патрабаваньні», «закатаў рукавы», цытаваў рашэньні ЭСПЧ.
Палітыку сыстэматычна адмаўлялі ў мэдыцынскай дапамозе, піша «Настоящее время», якое падрыхтавала відэа «300 дзён у ШЫЗА, галадоўка, забарона на спатканьні і прамовы Пуціна. Як Навальны гінуў у турме».
Паплечнікі Навальнага лічаць, што яго забілі. Расейскія ўлады сьцьвярджалі, што сьмерць наступіла з натуральных прычын.
На Барысаўскія могілкі ў Маскве з раніцы прыходзяць людзі з кветкамі і ўскладаюць іх на магілу Навальнага. Людзей пускаюць свабодна, аднак ля магілы дзяжураць паліцыянты, у тым ліку ў цывільным.
На могілкі прыехалі бацькі Навальнага з бацькамі ягонага паплечніка Ільлі Яшына, які цяпер у эміграцыі.
Расейская дыяспара анансавала акцыі памяці палітыка. У Расеі акцыі памяці Навальнага не анансаваныя. Палітык быў унесены ў рэестр тэрарыстаў і экстрэмістаў, які вядуць улады, і нават пасля яго сьмерці згадка ягонага імя або публікацыя фатаграфій могуць расцэньвацца расейскімі ўладамі як падбухторваньне да экстрэмізму і пацягнуць за сабою адміністрацыйны ці крымінальны перасьлед.
Па зьвестках выданьня «Вёрстка», за саму згадку імя Навальнага ў Расеі перасьледавалі больш за 150 чалавек. Яны падвяргаліся як штрафам, так і арыштам.
Аляксей Навальны, заснавальнік Фонду барацьбы з карупцыяй, быў адным з самых яскравых апазыцыйных палітыкаў Расеі, галоўным апанэнтам прэзыдэнта Ўладзіміра Пуціна. Праводзіў шматлікія расьсьледаваньні фактаў карупцыі ў вышэйшых эшалёнах расейскай улады.
У 2013 годзе балятаваўся на выбарах мэра Масквы, атрымаўшы 27% галасоў выбарцаў. У 2020 годзе перажыў спробу атручэньня баявым атрутным рэчывам «Навічок». Пасьля лячэньня ў Нямеччыне ў 2021 годзе вярнуўся ў Расею, дзе быў неадкладна арыштаваны і атрымаў шэраг прысудаў, у выніку назначаны яму тэрмін склаў 19 гадоў пазбаўленьня волі па некалькіх крымінальных артыкулах, уключаючы экстрэмізм.
Форум