Як паведаміў праўладны Telegram-канал «Белорусский силовик», «у раёне паловы першай ночы над Гомлем сыстэмы СПА УС РБ зьбіла «транзытнага госьця».
У той жа час не ўдакладняецца прыналежнасьць гэтага дрона, Украіны ці Расеі.
Telegram-канал «Флагшток — Гомельшчына» паведаміў, што бесьпілётнік зьбілі прыблізна ў 00:32 над Гомлем. Аскепкі ўпалі на зямлю ў цэнтральнай і паўночна-ўсходняй частках горада.
«Гук выбуху пачулі ва ўсім горадзе і ў прыгарадах. У Гомлі праз выбуховую хвалю спрацавалі сыгналізацыі аўтамабіляў, жыхары горада адчувалі вібрацыю сьцен дамоў. На вуліцы адчуваўся пах гару», — адзначаецца ў паведамленьні з спасылкай на жыхароў Гомля.
У Telegram-канале Гомельскага абласнога выканкаму ўначы адрэагавалі на паведамленьні аб зьбіцьці дронаў. Улады заклікалі не панікаваць і не рэагаваць «на правакацыі».
«У сетцы распаўсюджваюцца відэаролікі аб імаверным падзеньні нейкага аб’екта ў Гомлі. Для пацьвярджэньня або зьняпраўджаньня гэтай інфармацыі неабходныя камэнтары афіцыйных крыніц. Усё ў парадку, супакойцеся», — гаворыцца ў паведамленьні.
У той жа час у Міністэрстве абароны Беларусі пакуль гэтай інфармацыі не камэнтуюць.
У камандаваньні Паветраных сіл Украіны паведамілі, што ў ноч на 13 лютага расейскія войскі ў некалькі хваляў атакавалі ўкраінскія гарады 140 ударнымі дронамі і бесьпілётнікамі-імітатарамі.
Украінскія сродкі СПА зьбілі 85 ударных дронаў над Харкаўскай, Палтаўскай, Сумскай, Чаркаскай, Чарнігаўскай, Кіраваградзкай, Днепрапятроўскай, Мікалаеўскай, Херсонскай і Адэскай вобласьцямі. 50 расейскіх бесьпілётнікаў абясшкодзілі сродкамі радыёэлектроннай барацьбы. У той жа час ва Ўкраіне не паведамілі, ці былі выпадкі перанакіраваньня расейскіх дронаў на тэрыторыю Беларусі.
Украінскі Telegram-канал, які адсочвае перамяшчэньне расейскіх дронаў і традыцыйна паведамляе аб іх перамяшчэньні ў Беларусь, таксама не паведаміў аб такіх выпадках у ноч на 13 лютага. Паводле яго зьвестак, апошні раз расейскія дроны вярталіся ў Беларусь у ноч на 10 лютага.
У Міністэрстве абароны Расеі паведамілі, што над расейскімі рэгіёнамі зьбілі нібыта 83 украінскія бесьпілётнікі, у тым ліку 37 над Бранскай, па 12 над Курскай і Ліпецкай, 9 — над Цьвярской, па 3 — над Белгарадзкай, Калускай, Смаленскай і Варонескай і адзін — над Растоўскай вобласьцямі.
Раней маніторынгавая група «Беларускі Гаюн» паведамляла, што ў 2024 годзе ў Беларусь заляцела 395 дронаў з Расеі і Ўкраіны, у тым ліку 5 выведных дронаў.
Форум