Гэтая мера будзе дзейнічаць цягам 6 месяцаў, паведамляе нідэрляндзкі тэлеканал NOS.
Вайсковая паліцыя Нідэрляндаў зь 9 сьнежня будзе праводзіць узмоцненыя праверкі на сухапутных межах. Такая мера ўводзіцца для барацьбы з гандлем людзьмі і нелегальнай міграцыяй, яна ўжо атрымала ўхвалу кабінэту міністраў краіны.
Наколькі інтэнсіўнымі будуць праверкі, пакуль невядома: штат вайсковай паліцыі для гэтых мэтаў павялічваць не плянуюць.
У Схіпголе і іншых аэрапортах Нідэрляндаў узмоцнены памежны кантроль будзе арганізаваны толькі на рэйсах з краінаў падвышанай рызыкі.
Цяпер у Нідэрляндах ажыцьцяўляюцца толькі выбарачныя праверкі на памежных пераходах.
Урад Нідэрляндаў называе рашэньне апраўданым у сувязі зь вялікім наплывам шукальнікаў прытулку ў краіне.
- Дзяржавы – сябры Эўразьвязу маюць права аднавіць памежны кантроль пры наяўнасьці непрадбачаных абставінаў ці ў экстраных выпадках. Гэтую меру могуць увесьці толькі часова (на 6 месяцаў) і пасьля працягнуць максымум да двух гадоў.
- З 16 верасьня 2024 году кантроль на сухапутных межах ужо аднавіла Нямеччына. Узмоцнены памежны кантроль унутры ЭЗ таксама дзейнічае ў Францыі, Аўстрыі і некаторых іншых краінах.
Форум