Ёрг Дорнаў зьяўляецца сябрам ультраправай папулісцкай партыі «Альтэрнатыва для Нямеччыны» (AfD). Ён саўладальнік ТАА «Цыбулька-Бел», сельскагаспадарчага прадпрыемства ў Беларусі.
Нядаўна зьявілася інфармацыя пра тое, што беларусаў, якіх рэжым Лукашэнкі судзіў у адміністрацыйных справах, адпраўлялі працаваць на плянтацыі цыбулі, якія належаць кампаніі Дорнаў.
Генэральны сакратар AfD у Саксоніі Ян Цвэрг заявіў, што партыя «вітае той факт, што гэтая справа цяпер расьсьледуецца юрыдычна чыстым і заснаваным на фактах чынам. Мы давяраем незалежнай саксонскай судовай сыстэме». Ягоныя словы прыводзіць Bild.
- 24 верасьня сайт reform.news апублікаваў матэрыял, у якім сьцьвярджалася, што ўладальнік ТАА «Цыбулька-Бел» Дорнаў заключыў пагадненьне зь лідзкім Цэнтрам ізаляцыі правапарушальнікаў і рэгулярна прыцягваў асуджаных паводле палітычных артыкулаў да працы на сваёй цыбульнай плянтацыі. Адзначаецца, што ім плацілі «каля 5 эўра» ў эквіваленце ў дзень, пры гэтым нямецкі палітык нібыта «асабіста правяраў працу палітвязьняў».
- Факт выкарыстаньня іх працы пазьней пацьвердзіў нямецкім тэлежурналістам былы палітвязень Сяргей Чарняк, зь якім яны сустрэліся ў Польшчы.
- «Цыбулька-Бел» зарэгістраваная ў Адзіным дзяржаўным рэгістры 2 кастрычніка 2020 году ў аграгарадку Гуды (Горадзенская вобласьць). Упершыню пра беларускі бізнэс Дорнаў сёлета ў красавіку паведаміла нямецкая газэта Welt am Sonntag, расьсьледаваньне якой разьмясьціў у сябе папулярны таблёід Bild. Адзначалася, што за ўтойваньне факту валоданьня «буйным сельскагаспадарчым прадпрыемствам» дэпутату пагражала адказнасьць. 7 жніўня яго аштрафавалі на 20 682 эўра.
- 25 верасьня нямецкі юрыст Фэрдынанд Мюлер ініцыяваў расьсьледаваньне супраць Дорнаў, падаўшы заяву аб завядзеньні крымінальнай справы ў сувязі з гэтым інцыдэнтам.
Форум