Адзін з галоўных апазыцыйных палітыкаў Вэнэсуэлы, экс-кандыдат у прэзыдэнты Эдмунда Гансалес пакінуў краіну. Раней улады Вэнэсуэлы выдалі ордэр на яго арышт.
Гансалес на працягу некалькіх дзён знаходзіўся ў гішпанскай амбасадзе ў Каракасе. Па словах віцэ-прэзыдэнта Вэнэсуэлы Дэльсі Радрыгес, палітык запытаў у Гішпаніі палітычны прытулак. Радрыгес дадала, што ўрад дазволіў Гансалесу пакінуць краіну дзеля аднаўленьня «палітычнага міру і спакою».
3 верасьня суд у Вэнэсуэле на запыт пракуратуры выдаў ордэр на арышт Эдмунда Гансалеса. Яго падазраюць у шэрагу злачынстваў, у тым ліку ў падбухторваньні да непадпарадкаваньня законам, падробцы дакумэнтаў, дывэрсіі ў інфармацыйных сыстэмах і ўдзеле ў злачыннай групоўцы.
Выбары ў Вэнэсуэле прайшлі 28 ліпеня. Гансалес, а таксама лідэрка апазыцыі Марыя Карына Мачада, якую не дапусьцілі да выбараў, заявілі, што ім удалося атрымаць пратаколы з 73 працэнтаў участкаў. Яны паказваюць на тое, што Гансалес апярэдзіў Нікаласа Мадура, які перамог на выбарах, больш чым з двухразовым адрывам.
Па дадзеных падкантрольнай Мадура Нацыянальнай выбарчай рады Вэнэсуэлы, дзейны прэзыдэнт набраў 51,2 адсотка галасоў, а Эдмунда Гансалес — 44,2 адсотка.
У гарадах Вэнэсуэлы ўспыхнулі масавыя пратэсты. Тысячы супернікаў Мадура 29 ліпеня выйшлі на вуліцы Каракаса і да офісаў Нацыянальных выбарчых органаў па ўсёй краіне. Пачаліся сутыкненьні з паліцыяй і вайскоўцамі.
Дзярждэпартамэнт ЗША прызнаў Эдмунда Гансалеса пераможцам прэзыдэнцкіх выбараў у Вэнэсуэле. ЗША лічаць, што галасаваньне прайшло «з сур’ёзнымі парушэньнямі, у выніку чаго былі аб’яўлены вынікі, якія не адлюстроўваюць волю вэнэсуэльскага народа».
Форум