Мова ідзе пра «групу грамадзян зь ліку стваральнікаў, адміністратараў і іншых удзельнікаў», якія ўваходзяць у грамадзкія арганізацыі «Пагоня» і «Беларускі полк „Пагоня“».
На сайце МУС сьцьвярджаецца, што да «фармаваньня» маюць дачыненьне Віталь Гуркоў, Андрэй Краўчанка, Канстанцін Якаўлеў і Сямён Букін.
У пераліку ўзгадваюцца тэлеграм-каналы «Беларускі полк „ПАГОНЯ“», «Грамадзкае аб’яднаньне „ПАГОНЯ“», суполка ў гэтым жа мэсэнджары «Грамадзкае аб’яднаньне „ПАГОНЯ“», а таксама адпаведны тэлеграм-бот.
Пра рэгістрацыю Міністэрствам юстыцыі Ўкраіны грамадзкай арганізацыі «Пагоня» паведамлялася 21 лістапада 2022 году. Адзначалася, што мэта яе стварэньня — «падтрымка беларускага добраахвотніцкага руху ва Ўкраіне, а таксама кансалідацыя беларускай дыяспары для вызваленьня Ўкраіны і Беларусі ад расейскіх акупантаў і злачыннай дыктатуры Лукашэнкі».
Указвалася, што заснавальнікамі аб’яднаньня выступілі беларусы, якія пастаянна жывуць ва Ўкраіне, а таксама байцы беларускага палку «Пагоня». Дырэктарам аб’яднаньня быў прызначаны беларускі спартовец, шматразовы чэмпіён сьвету па тайскім боксе і кікбоксінгу Віталь Гуркоў, які ўваходзіў таксама ў склад Свабоднага аб’яднаньня спартоўцаў Беларусі, якое дзейнічала за мяжой.
Андрэй Краўчанка — лёгкаатлет, срэбраны прызэр Алімпійскіх гульняў 2008 году ў дзесяціборстве. Канстанцін Якаўлеў — былы галоўны трэнэр гандбольнага клюбу «Віцязь-Леон», Сямён Букін — экс-начальнік зборнай Беларусі па спартовай гімнастыцы.
- Пра стварэньне палку «Пагоня» ў складзе Інтэрнацыянальнага легіёну Ўзброеных сіл Украіны (УСУ) было абвешчана 30 сакавіка 2022 году. Сузаснавальнікамі фармаваньня называліся былы менскі рэстаратар, грамадзкі дзяяч Вадзім Пракоп’еў і прадстаўнік Аб’яднанага пераходнага кабінэту па абароне і нацыянальнай бясьпецы Валеры Сахашчык (сышоў у адстаўку 1 жніўня сёлета).
- У чэрвені 2022 году паведамлялася, што першая група добраахвотнікаў палку падпісала кантракты зь Сіламі спэцыяльных апэрацый УСУ. У тым жа месяцы адзначалася, што байцоў «Пагоні» трэніруе амэрыканец Мэт'ю Паркер, адзін з інструктараў Інтэрнацыянальнага легіёну.
- У верасьні 2022 году стала вядома, што Пракоп’еў пакінуў полк, у якім займаў пасаду памочніка камандзіра.
- 10 ліпеня 2023 году Радыё Свабода паведаміла, што полк «Пагоня» «фактычна спыніў існаваньне».
Форум