Эўразьвяз знайшоў шчыліну, каб абысьці вэта Вугоршчыны на перадачу даходаў ад замарожаных актываў Расеі на вайсковыя патрэбы Ўкраіны. Пра гэта паведамляе Financial Times.
Паколькі Вугоршчына ўстрымалася ад папярэдняга пагадненьня аб выдзяленьні даходаў ад заблякаваных у Эўропе расейскіх сродкаў, яна «не павінна быць часткай рашэньня аб выкарыстаньні гэтых грошай», сказаў кіраўнік дыпляматыі ЭЗ Жузэп Бурэль.
Бурэль удакладніў, што з Вугоршчынай спрабавалі дамовіцца. У прыватнасьці, прапаноўвалі Будапэшту ня ўдзельнічаць у падтрымцы Ўкраіны, але не блякаваць рашэньне большасьці астатніх краін Эўразьвязу. Вугоршчына адмовілася.
Па зьвестках выданьня Politico, шчыліна «прывяла вугорскіх палітыкаў у лютасьць». Аб першым траншы даходаў ад замарожаных расейскіх актываў у Фонд дапамогі Ўкраіне Бурэль аб’явіў сёньня, 24 чэрвеня, перад сустрэчай кіраўнікоў МЗС краін Эўразьвязу. Перавод складзе 2,5 мільярда эўра, перадае «Эўрапейская праўда».
«І ў нас ёсьць юрыдычная працэдура, якая дае магчымасьць пазьбегнуць любых блякаваньняў. Першы транш паступіць на наступным тыдні, у ліпені. Другі — праз некалькі тыдняў», — адзначыў Бурэль.
У Эўразьвязе замарожана каля 210 мільярдаў эўра актываў Банку Расеі. За год яны прыносяць прыкладна пяць мільярдаў эўра даходаў. Краіны ЭЗ ухвалілі плян падтрымкі Ўкраіны за кошт замарожаных расейскіх грошай у траўні 2024 году.
Politico расказвае, што распараджацца Фондам дапамогі Ўкраіне будуць «агенты па рэалізацыі»: яны змогуць закупляць зброю і іншыя тавары, якія Кіеў уключыў у сьпіс прыярытэтных. Па зьвестках выданьня, сёлета «агентамі» стануць Нямеччыныа, Чэхія і Данія, налета выберуць іншых.
Знойдзеная шчыліна можа таксама расчысьціць шлях «Групы сямі» да выдзяленьня Ўкраіне крэдыту памерам 50 мільярдаў даляраў, які плянуецца забясьпечваць менавіта даходамі ад расейскіх замарожаных актываў.
Вугоршчына — найбольш па-прарасейску настроеная краіна ЭЗ — сыстэматычна выступае супраць дапамогі Ўкраіне ў адбіцьці расейскай агрэсіі. Будапэшт блякуе сем іншых рашэньняў Эўразьвязу аб узбраеньні Кіева на суму ў 6,6 мільярда эўра. Гэтую праблему таксама абмяркоўваюць на паседжаньні кіраўнікоў МЗС краін Эўразьвязу сёньня, 24 чэрвеня.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум