У Гішпаніі ўкраінак і беларусак заваблівалі ў сэксуальнае рабства. Аб ліквідацыі злачыннай групы, якая займалася гандлем людзьмі з мэтай сэксуальнай эксплёатацыі, паведаміў Эўрапол. Пра гэта піша reform. news.
Эўрапол аказаў падтрымку Нацыянальнай паліцыі Іспаніі ў ліквідацыі злачыннай групы, якая займалася гандлем людзьмі з мэтай сэксуальнай эксплёатацыі. Падазроныя заваблівалі ахвяр абяцаньнямі аформіць для іх візы ўцекачоў, фінансавую падтрымку і знайсьці працу.
У выніку акцыі, праведзенай 24 траўня 2024 году ў Альмэрыі, адбылося пяць арыштаў, уключаючы падазраванага лідэра (адзін гішпанец, два расейцы і два грамадзяніна Ўкраіны). Устаноўленыя асобы 14 ахвяр, праведзеныя ператрусы ў пяці месцах, канфіскаваныя два аўтамабілі клясы люкс, наяўныя грошы, электроннае абсталяваньне, працоўныя кантракты на працу ў сфэры паслуг і іншыя розныя дакумэнты, зьвязаныя з клюбам, дзе эксплёатаваліся ахвяры.
Паводле інфармацыі Эўрапола, злачынная група, якая дзейнічае з 2020 году, вэрбавала сваіх ахвяр у інтэрнэце, пераважна праз сацыяльныя сеткі, прадстаўляючыся мэнэджэрамі кадравага агенцтва. Ахвяр заваблівалі прапановамі аб працы гостэс і ў якасьці адміністратараў. Затым меркаваныя гандляры людзьмі эксплёатавалі жанчын, пераважна ўкраінак, а таксама грамадзянак Беларусі, у клюбе прастытуцыі ў Эль-Эхіда (Альмэрыя).
Ахвяраў прывозілі ў Гішпанію па турыстычных візах, пры гэтым ім абяцалі легальную працу ў індустрыі забаў і турызму. Апынуўшыся ў Гішпаніі, яны атрымлівалі інструкцыі падаць заяву на часовую абарону ў сувязі з вайной ва Ўкраіне. Пасьля гэтага ахвяры атрымлівалі від на жыхарства ў Гішпаніі. Маладым жанчынам паабяцалі даць ільготы на працу, зьвязаныя з гэтай абаронай. Аднак ахвяры не атрымалі ніякай працоўнай дамовы і апынуліся ўцягнутымі ў прастытуцыю.
Форум