Стакгольмскі міжнародны інстытут дасьледаваньня праблем міру (SIPRI) прыйшоў да высновы аб павелічэньні расходаў дзяржаў на ядзерную зброю.
Як адзначаецца ў штогадовым дакладзе за 2024 год, дзевяць ядзерных дзяржаў — ЗША, Расея, Вялікая Брытанія, Францыя, Кітай, Індыя, Пакістан, Карэйская Народна-Дэмакратычная Рэспубліка (Паўночная Карэя) і Ізраіль — працягвалі мадэрнізаваць свае ядзерныя арсэналы, а некаторыя ў 2023 годзе разгарнулі новыя ядзерныя ракеты або сыстэмы зброі ў 2023 годзе.
«Варта адзначыць, што ў 2023 годзе было некалькі публічных заяваў аб тым, што Расея разьмясьціла ядзерную зброю на тэрыторыі Беларусі, хоць пераканаўчых візуальных доказаў таго, што фактычнае разьмяшчэньне боегаловак адбылося, няма», — адзначылі дасьледнікі.
Паводле іх, з 12 121 боегалоўкі агульнага сусьветнага запасу каля 9585 знаходзіліся на вайсковых складах для патэнцыйнага выкарыстаньня. «Прыблізна каля 2100 разгорнутых боегаловак балістычных ракет знаходзіліся ў стане павышанай баявой гатоўнасьці. Амаль усе гэтыя боегалоўкі належалі Расеі або ЗША, але лічыцца, што ўпершыню Кітай мае некаторыя боегалоўкі ў стане павышанай боегатоўнасьці», — адзначаецца ў дакладзе.
«Хоць агульная колькасьць ядзерных боегаловак у сьвеце працягваецца зьніжацца ў выніку паступовага дэмантажу зброі часоў халоднай вайны, на жаль, мы працягваем назіраць з году ў год павелічэньне колькасьці дзейных ядзерных боегаловак. Падобна, што гэтая тэндэнцыя захаваецца і, магчыма, узмацніцца ў наступныя гады, і гэта выклікае надзвычайную трывогу», — заявіў дырэктар SIPRI Дэн Сміт.
Згодна з інфармацыяй SIPRI, Расея і ЗША разам валодаюць амаль 90% усёй ядзернай зброі. «Празрыстасьць адносна ядзерных сіл зьнізілася ў абедзьвюх краінах пасьля поўнамаштабнага ўварваньня Расеі ва Ўкраіну ў лютым 2022 году, і дэбаты вакол пагадненьняў аб разьмяшчэньні ядзернай зброі сталі больш актуальнымі», — адзначаецца ў дакладзе.
Сёлета ў траўні амэрыканскі Інстытут вывучэньня вайны (ISW) адзначылі ў сваёй справаздачы, што ні Расея, ні Беларусь не імкнуцца да ядзернай эскаляцыі і што выкарыстаньне імі ядзернай зброі застаецца малаімаверным.
Пляны разьмяшчэньня ядзернай зброі ў Беларусі. Асноўнае
25 сакавіка прэзыдэнт Расеі Ўладзімір Пуцін у этэры тэлеканалу «Россия-24» заявіў, што 1 ліпеня ў Беларусі скончыцца будаўніцтва сховішча для тактычнай ядзернай зброі. Паводле яго, Аляксандар Лукашэнка ўжо доўгі час прасіў яго разьмясьціць тактычную ядзерную зброю ў Беларусі. Акрамя таго, Масква ўжо перадала Менску ракетны комплекс «Іскандэр», які можа выкарыстоўваць гэтую зброю, і што дзесяць беларускіх самалётаў нібыта ўжо пераабсталявалі для нясеньня такой зброі.
Сакратар Рады нацыянальнай бясьпекі і абароны Ўкраіны Аляксей Данілаў заявіў, што разьмяшчэньне ядзернай зброі зьяўляецца крокам да «да ўнутранай дэстабілізацыі краіны і максымальна падвышае ўзровень нэгатыўнага ўспрыманьня і агульнага адпрэчаньня ў беларускага грамадзтва Расеі і Пуціна».
Міністэрства замежных спраў Украіны запатрабавала тэрмінова склікаць паседжаньне Рады Бясьпекі ААН у сувязі з заявай Пуціна аб разьмяшчэньні расейскай ядзернай зброі ў Беларусі.
У Пэнтагоне пасьля заявы Пуціна адзначылі, што пакуль ня бачылі ніякіх прыкметаў перамяшчэньня ядзернай зброі на тэрыторыю Рэспублікі Беларусь.
Некаторыя вайсковыя экспэрты таксама адзначылі, што да разьмяшчэньня такой зброі ў Беларусі насамрэч нічога не гатова. Іншыя дасьледчыкі гавораць аб тым, што ядзерная зброя ўсё ж зьявіцца, і гэта пацягне за сабой заснаваньне сталых вайсковых базаў Расеі на беларускай тэрыторыі.
У Міністэрстве замежных спраў Беларусі 28 сакавіка заявілі, што рашэньне аб разьмяшчэньні на тэрыторыі краіны ядзернай зброі ўхвалена ў адказ на «беспрэцэдэнтны палітычны, эканамічны і інфармацыйны ціск з боку ЗША, Вялікай Брытаніі і іх хаўрусьнікаў па NATO, а таксама дзяржаў Эўрапейскага зьвязу».
Прапагандысты ў дзяржаўных СМІ пазытыўна ацанілі намеры Расеі перакінуць тактычную ядзерную зброю на тэрыторыю Беларусі і пачалі пагражаць ударамі заходнім дзяржавам.
Эўразьвяз і Польшча заявілі аб тым, што зьбіраюцца ўвесьці больш жорсткія санкцыі супраць Менску ў выпадку разьмяшчэньня тактычнай ядзернай зброі.
Кітай заклікаў не дапусьціць далейшай канфрантацыі ядзерных дзяржаў. Між іншым, у сумеснай заяве, прынятай па выніках нядаўняй сустрэчы старшыні КНР Сі Цзіньпіна і прэзыдэнта Расеі Ўладзіміра Пуціна, ёсьць пункт:
«Усе ядзерныя дзяржавы не павінны разьмяшчаць ядзерную зброю за межамі нацыянальных тэрыторый і павінны вывесьці ўсю разьмешчаную за мяжой ядзерную зброю».
Прадстаўнік Аб’яднанага пераходнага кабінэту ў абароне і нацыянальнай бясьпецы Валер Сахашчык у інтэрвію Свабодзе дапусьціў, што намеры расейцаў могуць актывізаваць партызанскі рух у Беларусі.
Пляны Расеі разьмясьціць тактычную ядзерную зброю ў Беларусі ёсьць «небясьпечнай і безадказнай рыторыкай» Масквы, заявіў генэральны сакратар Паўночнаатлянтычнага альянсу Енс Столтэнбэрг літоўскім журналістам на дыстанцыйнай прэс-канфэрэнцыі 27 красавіка. Пляны Расеі асудзілі краіны Захаду, прадстаўнікі беларускіх дэмакратычных сілаў, насьцярожана выказаўся Кітай.
16 траўня пастаянны прадстаўнік Беларусі ў ААН Валянцін Рыбакоў падчас дэбатаў аб месцах непастаянных чальцоў Рады Бясьпекі ААН на 2024–2025 гады, камэнтуючы пытаньне аб разьмяшчэньні на тэрыторыі Беларусі расейскай тактычнай ядзернай зброі, сказаў, што заява Расеі — «перш за ўсё гэта проста заява» і «нічога ў практычным сэнсе не было зроблена ў гэтых адносінах».
Кіраўнік Міністэрства абароны Беларусі Віктар Хрэнін сустрэўся з расейскім калегам Сяргеем Шайгу, які прыляцеў 25 траўня 2023 году ў Менск. Міністры падпісалі дакумэнты, якія вызначаюць парадак утрыманьня расейскай нестратэгічнай ядзернай зброі ў адмысловым сховішчы на тэрыторыі Беларусі, паведамілі дзяржаўныя СМІ. Шайгу падкрэсьліў, што «кантроль над зброяй і рашэньне аб ужываньні застаецца за Масквой».
9 чэрвеня ў Сочы кіраўнік Расеі Пуцін заявіў, што 7–8 ліпеня на тэрыторыі Беларусі скончыцца падрыхтоўка «адпаведных збудаваньняў», пасьля чаго з Расеі адразу завязуць тактычную ядзерную зброю.
13 чэрвеня Лукашэнка заявіў, што ядзерная зброя ў Беларусі ў тры разы магутнейшая за прымененую амэрыканцамі ў 1945-м у Хірасіме і Нагасакі. 16 чэрвеня Пуцін на эканамічным форуме ў Санкт-Пецярбургу адзначыў, што першыя ядзерныя зарады ўжо даставілі ў Беларусь.
19 чэрвеня прэзыдэнт ЗША Джо Байдэн назваў «рэальнай» пагрозай тое, што Пуцін аддасьць загад аб выкарыстаньні тактычнай ядзернай зброі падчас вайны супраць Украіны.
Кіраўнік выведкі Ўкраіны Кірыл Буданаў 20 чэрвеня заявіў, што, згодна са зьвесткамі выведкі, Расея пакуль не перадала Беларусі ніводнай ядзернай боегалоўкі. Аднак ён адзначыў, што падрыхтоўка сховішчаў пад ТЯЗ сапраўды вядзецца.
Форум