Спэцдакладчыкі ААН выказалі занепакоенасьць у сувязі зь меркаванай адмовай у належнай мэдычнай дапамозе Паўлу Кучынскаму і неадпаведнасьцю ўмоў яго ўтрыманьня пад вартай стану ягонага здароўя.
Яны нагадалі беларускаму ўраду пра міжнародныя стандарты ў галіне правоў чалавека, якія забараняюць катаваньні і жорсткае і бесчалавечнае абыходжаньне, якое прыніжае годнасьць чалавека, піша «Вясна».
«Адсутнасьць мэдычнай дапамогі і адмова ў шпіталізацыі затрыманага ў крытычным стане могуць быць ахарактарызаваныя як сурʼёзны боль і пакуты, наўмысна прычыненыя службовай асобай».
Зварот падпісалі Мэт’ю Джылет, намесьнік старшыні ў камунікацыях Рабочай групы па адвольных затрыманьнях, Анаіс Марэн, спэцыяльная дакладчыца аб правах чалавека ў Беларусі, Хэба Хаграс, спэцыяльная дакладчыца аб правах людзей з абмежаванымі магчымасьцямі, Тляленг Мафакенг, спэцыяльная дакладчыца аб праве кожнага на карыстаньне найвышэйшым дасяжным узроўнем фізычнага і псыхічнага здароўя.
Спэцдакладчыкі ААН, сярод іншага, просяць урад Беларусі:
- Даць любую дастатковую інфармацыю і камэнтары з нагоды сытуацыі.
- Даць інфармацыю аб фактычных і юрыдычных падставах для арышту, затрыманьня, выстаўленьня абвінавачаньняў і вынясеньня прысуду Паўлу Кучынскаму і растлумачыць, як гэтыя дзеяньні адпавядаюць абавязаньням Беларусі ў міжнародным праве ў галіне правоў чалавека.
- Растлумачыць, якім чынам стан здароўя і інваліднасьць Паўла Кучынскага былі прынятыя пад ўвагу адпаведнымі органамі ўлады пры прыняцьці рашэньня аб ягоным папярэднім зьняволеньні пад варту і вынясеньні яму прысуду.
- Даць інфармацыю аб бягучым стане здароўя Паўла Кучынскага і растлумачыць, наколькі мэдычная дапамога, якая ім атрымліваецца, і ўмовы яго ўтрыманьня пад вартай адпавядаюць абавязаньням Беларусі ў міжнародным праве ў галіне правоў чалавека.
Павал Кучынскі, палітзьняволены з Маладэчна, мае першую групу інваліднасьці — у яго лімфома Ходжкіна чацьвёртай стадыі. Нягледзячы на анкалягчнае захворваньне, яго ўтрымліваюць у зьняволеньні больш за два гады. У чэрвені пазалетась яго асудзілі на 5 гадоў калёніі, а па выніках апэляцыі паменшылі прысуд толькі на тры месяцы.
Форум