Мы правядзём вас праз чацьвёрты і пяты кругі пекла.
Ільля Салей, былы палітзьняволены, юрыст перадвыбарчага штабу Віктара Бабарыкі, адвакат Марыі Калесьнікавай:
«Самае складанае ў хатнім арышце — абсалютна поўная ізаляцыя. 24 гадзіны на дзень, 7 дзён на тыдзень на працягу паўгода я практычна быў увесь час адзін. Мне было забаронена карыстацца мабільным тэлефонам, інтэрнэтам, абсалютна любымі сродкамі сувязі».
Сьвятлана Алексіевіч, нобэлеўская ляўрэатка:
«Хатні арышт — спосаб прыніжэньня, толькі крыху іншы, больш выдасканалены. Мы думаем, што «ах, там нейкія страшныя садысты толькі працуюць». Не, там працуюць іншыя людзі, і разумныя людзі, але ў іх свая герархія каштоўнасьцяў. І грошы».
Рэгіна Лавор, былая палітзьняволеная:
«З 19 вечара і да 6 раніцы я ўвесь час павінна была знаходзіцца ў доме, не выходзіць увогуле з дома, і ўвесь гэты час я павінна была рэагаваць на візыты супрацоўнікаў. Калі было патрабаваньне прыехаць на мэдычны агляд на стан алькаголю, я павінна была гэта рабіць».
Віктар Пархімчык, былы палітзьняволены:
«Я працаваў у ІТ-сфэры, а ў першы мой працоўны дзень мяне накіравалі на пасаду жывёлавода 5-га разраду. Сярод маіх абавязкаў было прымаць роды ў каровы, пілаваць каровам капыты, неяк прадбачыць, калі карова хоча да быка... Судовая сыстэма працуе, як гулагаўскі кадравы цэнтар, які замяшчае недахоп працоўнай сілы з дапамогай прымусовай працы, у тым ліку і палітвязьняў».
У аўторак 23 красавіка выйдзе чацьвёртая частка падкасту Радыё Свабода «Архіпэляг БЕЛАГ» пра тое, як катуюць падчас этапаў, а таксама пра найбольш вядомыя калёніі Беларусі: Гомельскую жаночую, Наваполацкую і Шклоўскую. Гэта шосты круг пекла.
Падкаст «Архіпэляг БЕЛАГ». Дзе глядзець і слухаць
Гэта падкаст Ганны Соўсь пра тое, як Беларусь паступова ператвараюць у турму.
У сямі частках візуалізаванага падкаста «Архіпэляг БЕЛАГ» мы пройдзем праз усе кругі пекла карнай сыстэмы рэжыму Лукашэнкі — затрыманьне, «суткі», сьледзтва, хатнія арышты, «хімію», этапы, калёніі, турмы і жыцьцё пад наглядам па вызваленьні. У гэтым нам дапамогуць былыя палітзьняволеныя, былыя сілавікі, праваабаронцы, а таксама нобэлеўская ляўрэатка Сьвятлана Алексіевіч.
Мы раскажам, як пабудаваны «Архіпэляг БЕЛАГ» знутры, на чым ён трымаецца, якія людзі там працуюць, на чый загад палітвязьняў катуюць і даводзяць да сьмерці. У падкасьце вы пачуеце парады былых палітвязьняў, былых сілавікоў і праваабаронцаў, як прайсьці «Архіпэляг БЕЛАГ» з найменшымі стратамі для псыхічнага і фізычнага здароўя.
Візуалізацыю падкасту разам з намі рабілі былыя палітзьняволеныя — Марыя Каленік, Лявон Халатран, Віктар Пархімчык, Анастасія Булыбенка, Натальля Карнеева і яшчэ некалькі чалавек, якія пажадалі захаваць ананімнасьць.
Новыя выпускі падкасту выходзяць кожны аўторак ад 2 красавіка на YouTube-канале Свабоды і асноўных падкаст-плятформах.
Як глядзець на YouTube
Падпішыцеся на наш YouTube-канал Радыё Свабода, каб не прапусьціць ніводнага выпуску.
Як слухаць падкаст
Калі вам зручней слухаць, а не глядзець, наш праект дасяжны на асноўных падкаст-плятформах. Выберыце тую, якая падыходзіць менавіта вам.
Чароўная спасылка — клікнуўшы на яе, вы аўтаматычна трапіце на адну з папулярных плятформаў.
