Выпадкі захворваньня навучэнцаў ліцэя БНТУ гастраэнтэравіруснай інфэкцыяй былі выяўлены ў апошнія два дні, для прадухіленьня яе распаўсюджваньня прынялі «комплекс санітарна-проціэпідэмічных мерапрыемстваў», паведамляе тэлеграм-канал БНТУ.
Перамяшчэньні вучняў па навучальных аўдыторыях абмежавалі, цяпер праводзяць дэзынфэкцыю памяшканьняў ліцэя, шматразовае вільготнае прыбіраньне памяшканьняў з выкарыстаньнем мыйных і сродкаў дэзынфэкцыі, узмацненьне кантролю выкананьня правілаў асабістай гігіены вучняў, вядуць сыстэматычны кантроль стану навучэнцаў.
Дзень адчыненых дзьвярэй, заплянаваны ў ліцэі на 6 красавіка, адмянілі.
Кожны навучэнец ліцэя, які «як наведвае заняткі, так і знаходзіцца дома», праходзіць «мэдыцынскі агляд лекарамі 19-й дзіцячай паліклінікі Менску або раённых паліклінік па месцы жыхарства».
4 красавіка Мінздароўя паведаміла пра шпіталізацыю ў дзіцячую інфэкцыйную клінічную бальніцу Менску сямі ліцэістаў БНТУ. Частка падлеткаў «зь меншымі скаргамі» знаходзілася на амбуляторным лячэньні дома.
Пазьней Мінадукацыі паведаміла, што ў шпіталізаваных вучняў ліцэя БНТУ мэдыкі «пацьвердзілі наравірус». У ведамстве адзначылі, што «гэтая кішэчная інфэкцыя можа быць выкліканая невыкананьнем правілаў асабістай гігіены навучэнцамі».
