Для Расеі суседняя краіна — «мэта шпіёнскай дзейнасьці і шкоднага ўплыву», — цытуе DW заяву паліцыі бясьпекі Фінляндыі (Supo).
У дакумэнце адзначаецца, што ў 2023 годзе Фінляндыя здолела падарваць умовы для працы расейскіх выведнікаў дзякуючы актыўнасьці контравыведкі, высылцы супрацоўнікаў спэцслужбаў з краіны і строгай візавай палітыцы. Тым ня менш выведныя апэрацыі Масквы па-ранейшаму ўяўляюць пагрозу. У прыватнасьці, яны могуць быць накіраваныя супраць фінскіх грамадзян, якія ўсё яшчэ падарожнічаюць ці пражываюць у Расеі, і для фінскіх грамадзян у трэціх краінах, заявілі ў Supo.
Кібэрасяродзьдзе і крытычная інфраструктура асабліва ўразьлівыя перад пагрозамі апэрацый уплыву і шпіянажу. Тым ня менш, паводле ацэнкі контравыведнікаў, маштабныя апэрацыі, накіраваныя на паралізаваньне нармальнай працы нацыянальнай крытычнай інфраструктуры на тэрыторыі Фінляндыі, у кароткатэрміновай пэрспэктыве застаюцца малаімавернымі.
Расея будзе далей практыкаваць «інструмэнталізацыю іміграцыі», каб выказаць «сваю незадаволенасьць уступленьнем Фінляндыі ў NATO», адзначаецца ў дакумэнце. У Supo ўпэўненыя, што ў Расеі няма прычын зьмяняць сваю памежную палітыку ў найбліжэйшай будучыні. «Гэта доўгатэрміновая пагроза, гэта просты спосаб для Расеі трымаць Фінляндыю ў напружаньні», — патлумачыў выканаўца абавязкаў кіраўніка фінскай спэцслужбы Тэему Турунен.
Фінляндыя, якая мае 1340-кілямэтровую мяжу з Расеяй, у лістападзе зачыніла ўсе памежныя пераходы, каб спыніць паток шукальнікаў прытулку, які фінскія ўлады разглядаюць як «гібрыдную атаку», зладжаную Масквой. Мяжа застанецца закрытай як мінімум да 14 красавіка.