Нікі Гэйлі перамагла на папярэдніх выбарах кандыдата ад рэспубліканцаў у акрузе Калюмбія, дзе знаходзіцца сталіца ЗША Вашынгтон. Колішняя прадстаўніца дзяржавы пры ААН набрала 62,9% галасоў аднапартыйцаў у гэтым рэгіёне. Для Гэйлі гэта першая перамога ў кампаніі.
Нягледзячы на гэую перамогу Гэйлі, Дональд Трамп застаецца відавочным фаварытам у Рэспубліканскай партыі — апытаньні не пакідаюць сумневаў, што менавіта былы прэзыдэнт будзе змагацца з Джо Байдэнам за пасаду ў Белым доме ў лістападзе.
Перад тым як перамагчы ў акрузе Калюмбія, Гэйлі мела паразы ў васьмі штатах, у тым ліку ў сваёй роднай Паўднёвай Караліне.
Паводле ацэнак многіх камэнтатараў, Трамп даб’ецца істотнага посьпеху і ў так званы Супэраўторак, 5 сакавіка, калі пройдзе адразу 16 галасаваньняў у розных штатах. Многія рэспубліканцы заклікалі Гэйлі спыніць барацьбу за намінацыю, аднак яна раней заявіла, што застанецца ў гонцы прынамсі да Супэраўторка. Апошнім часам яна ўсё больш рэзка крытыкуе Трампа, у тым ліку праз разыходжаньні ў пытаньнях міжнароднай палітыкі.
Іншыя супернікі Трампа ў партыі зьнялі свае кандыдатуры, у тым ліку губэрнатар Флёрыды Рон Дэ Сантыс, у якім многія бачылі асноўнага суперніка колішняга прэзыдэнта.
