У абласным МНС, куды карэспандэнтка «Люстэрка» зьвярнулася як занепакоеная жыхарка горада, расказалі, што адбылося кароткае замыканьне, але пашкоджаньне ўжо зьліквідавалі.
Пазьней у МНС Беларусі афіцыйна паведамілі, што сёньня ўвечары ратавальнікам паступіла паведамленьне аб пажары ў раёне вёскі Лятохі Віцебскага раёну. Пасьля прыбыцьця падразьдзяленьняў МНС (4 аўтацыстэрны і 1 штабны аўтамабіль) да месца інцыдэнту ўзгараньня не было. На зямлі ратавальнікі знайшлі абгарэлы электрычны провад. Папярэдне, абгарэў провад высакавольтнай лініі электраперадачы ў 110 кв.
«Падача электраэнэргіі аўтаматычна пераключылася на рэзэрвовую лінію. Адключэньня спажыўцоў не рабілася», — заявілі ў МНС.
«Віцебскаблводаканал» паведаміў, што «ў сувязі з адсутнасьцю электразабесьпячэньня ад электрасетак адбылося спыненьне помпавага абсталяваньня на водазаборы № 4», але цяпер помпы ўжо запусьцілі, падачу вады ў сетку аднавілі.
У сувязі з інцыдэнтам у наступныя суткі магчымае пагаршэньне якасьці вады, паведамілі ў «Віцебскаблводаканале» і папрасілі прабачэньня за нязручнасьці.
Паведамленьні пра гукі выбуху і ўспышку ў Віцебску, якую бачылі мясцовыя жыхары, зьявіліся ў СМІ. «Эўрарадыё» са спасылкай на словы мясцовых жыхароў пісала, што на станцыі адключыліся электрычныя помпы і ў некаторых раёнах зьнікла вада і электрычнасьць.
Тэлеграм-канал «Беларусь за МКАДом», спасылаючыся на мясцовых жыхароў, паведамляў, што людзі чулі гукі выбухаў.
