З 18 чэрвеня журналіста Дзяніса Івашына ўтрымліваюць у крытай турме № 8 ў Жодзіне, куды яго перавялі з магілёўскай калёніі № 15. Пра суд аб зьмене рэжыму ўтрыманьня Дзяніса Івашына на турэмны ягонага адваката не праінфармавалі. У мінулы аўторак палітзьняволенаму дазволілі патэлефанаваць жонцы. Званок доўжыўся 9 хвілін. Паводле Вольгі Івашынай, голас мужа гучаў бадзёра.
«Фізычна ён адчувае сябе добра, прынамсі кажа, што ні разу не хварэў ад пераезду. У ШЫЗА яго там ня кідаюць. Відаць, лічаць, што і строгага рэжыму для яго дастаткова. Штодня мае шпацыр. Праўда, раней скардзіўся, што часам менш за гадзіну доўжыцца прагулка. Мо цяпер нешта зьмянілася. Збольшага эмоцыі ў яго натуральныя для вязьніцы: часьцей за ўсё піша, што вельмі сумуе па сваяках і сябрах».
У калёніі № 15 Дзяніс Івашын з высокай тэмпэратурай трапіў у шпіталь. З пераводам у крытую турму ў Жодзіна Івашыну зьменшылі да адной базавай велічыні суму грошай, якія ён можа патраціць на пакупкі ў турэмнай краме.
«У Магілёве ён мог сабе сёе-тое ў краме набыць на 2 базавыя, цяпер мае толькі адну на месяц, бо тут рэжым у яго строгі. Адна бандэроль на год і рэчавая перадача, тэрміны бандэролі і кароткатэрміновага спатканьня стаяць на сакавік-красавік наступнага году.
Але ў краме Жодзіна ён упершыню пабачыў і купіў сабе марскую капусту. Кажа, што харчаваньне ў Жодзіне адназначна лепшае, чым было ў горадзенскай турме, і такое ж, як было ў магілёўскай калёніі».
Жонка журналіста таксама расказала, што Дзяніс далучыўся да малітвы за Беларусь, якая працягваецца ўжо шмат гадоў.
«Як высьветлілася, ён сам кожную нядзелю моліцца за Беларусь малітвай айца Льва Гарошкі. А я яму нядаўна прапанавала далучыцца да маёй гадзінкі ў няспыннай малітве за нашую краіну, якая ў мяне доўжыцца ўжо больш за 8 гадоў. Больш за паўтары сотні чалавек выбіраюць сабе пэўную гадзіну на тыдзень і ўвесь час моляцца за Беларусь або адмысловымі малітвамі, або сваімі словамі, мо нехта нават сьпявае. Дзяніс пагадзіўся ды далучыўся да маёй гадзінкі», — расказала Вольга Івашына.
Журналіста з Гародні Дзяніса Івашына арыштавалі ў сакавіку 2021 году і ў чэрвені 2022 году на закрытым працэсе асудзілі на 13 гадоў 1 месяц зьняволеньня праз абвінавачаньне ў «здрадзе радзіме» і «незаконным зборы і распаўсюдзе зьвестак аб прыватным жыцьці».
Да арышту Дзяніс Івашын працаваў як рэдактар-валянтэр беларускай вэрсіі сайту міжнароднай расьсьледніцкай супольнасьці InformNapalm, а таксама быў пазаштатным карэспандэнтам газэты «Новы час». Журналіст стаў вядомы дзякуючы сваім расьсьледаваньням пра скандальную будоўлю рэстарацыі ў Курапатах, а таксама пра пераход былых украінскіх «беркутаўцаў» у сілавыя структуры Беларусі.
Праваабаронцы прызналі Дзяніса Івашына палітзьняволеным.
