У Менску экспэртная група ў рэжыме відэасувязі ўзгадніла тэкст заявы кіраўнікоў краін СНД аб падтрымцы і прасоўваньні расейскай мовы як мовы міжнацыянальных зносінаў.
«У праекце заявы адзначаецца важнасьць захаваньня і папулярызацыі ўнікальнай моўнай і гісторыка-культурнай спадчыны дзяржаў СНД, канстатуецца значымасьць расейскай мовы ў справе ўмацаваньня агульнай культурна-гуманітарнай прасторы Садружнасьці, пацьвярджаецца прыхільнасьць выкарыстаньню расейскай мовы ва ўзаемных кантактах і на пляцоўках міжнародных арганізацый і форумаў», — адзначаецца ў афіцыйным паведамленьні інтэрнэт-парталу СНД.
У складзе экспэртнай групы працавалі прадстаўнікі Азэрбайджану, Армэніі, Беларусі, Казахстану, Кіргістану, Расеі, Таджыкістану, Узбэкістану і Выканаўчага камітэту СНД.
Чарговае пасяджэньне Савету кіраўнікоў дзяржаў СНД заплянавана на 13 кастрычніка. Яно мусіць адбыцца ў Бішкеку — сталіцы Кіргістану, які старшынствуе ў СНД у 2023 годзе.
