«З адкрытых крыніц я магу толькі адзначыць, што назіраецца дынамічны спад. Яны разьмяркоўваюцца, пераяжджаюць на іншыя тэрыторыі, нехта едзе ў адпачынак у Расею або ў „адпачынак“ па паўторнай вярбоўцы ў іншыя вайсковыя кампаніі», — сказаў Арвідас Анушаўскас журналістам 6 верасьня, паведаміла літоўскае выданьне LRT.
«Сытуацыя зусім іншая, чым была тры тыдні таму», — дадаў ён.
На пачатку жніўня Літва і Польшча заявілі, што ў Беларусі знаходзяцца да 4 тысяч вагнэраўцаў, якія пераехалі туды пасьля няўдалага мяцяжу 24 чэрвеня.
Прысутнасьць вагнэраўцаў у Беларусі, штучны міграцыйны крызіс і павелічэньне кантрабанды сталі прычынай закрыцьця некалькіх памежных пунктаў у Літве і Польшчы.
18 жніўня Літва закрыла 2 з 6 памежных пераходаў зь Беларусьсю — «Шумск» (зь беларускага боку — «Лоша») і «Цьверач» («Відзы»).
28 жніўня па выніках сустрэчы кіраўнікоў міністэрстваў унутраных спраў краін Балтыі і Польшчы міністарка ўнутраных спраў Літвы Агне Білатайце заявіла пра намер падрыхтаваць прапанову ўраду закрыць яшчэ два пункты пропуску на мяжы зь Беларусьсю — «Лаварышкі» (зь беларускага боку «Катлоўка») і «Райгорад» («Прывалка»).
На польска-беларускай мяжы з 10 лютага 2023 году адкрыты толькі адзін з шасьці пунктаў пропуску для легкавікоў і адзін для грузавікоў, у Берасьці.
30 жніўня намесьнік міністра ўнутраных спраў Польшчы Мацей Вонсік заявіў пра магчымасьць адкрыцьця пунктаў пропуску на польска-беларускай мяжы ў выпадку выкананьня канкрэтных умоваў — вываду вагнэраўцаў і спыненьня міграцыйнага патоку.
31 жніўня ўкраінскі Цэнтар нацыянальнага супраціву, які зьвязваюць з вайсковай выведкай і Сіламі спэцыяльных апэрацый Украіны, паведаміў, што палітычнае кіраўніцтва Расеі вырашыла да сярэдзіны верасьня вывесьці большую частку вагнэраўцаў у афрыканскія краіны — Нігер, Лібію, Судан, Малі, ЦАР і Мазамбік. Меншая частка вагнэраўцаў застануцца інструктарамі па падрыхтоўцы спэцыяльных падразьдзелаў Міністэрства ўнутраных спраў Беларусі «для супрацьдзеяньня магчымаму перавароту супраць Лукашэнкі або падпішуць кантракт зь Мінабароны Расеі на вайну супраць Украіны».
