Згодна з законапраектам, у Расеі будуць забароненыя хірургічнае ўмяшаньне і гарманальная тэрапія ў рамках трансгендэрнага пераходу. Іх дазволяць толькі для «лячэньня прыроджаных фізіялягічных анамалій фармаваньня полу ў дзяцей».
Акрамя гэтага, у расейскіх дакумэнтах забароняць мяняць гендэрны маркер, нават калі транспераход адбыўся за мяжой. Транспэрсонам забароняць усынаўляць і ўдачараць дзяцей, афармляць над імі апеку і папячыцельства. Таксама дзяржава анулюе шлюбы, калі хаця б адзін з пары ўжо зьдзейсьніў трансгендэрны пераход.
За законапраект прагаласавалі ўсе 386 прысутных у залі дэпутатаў. Цяпер законапраект павінен зацьвердзіць Савет Фэдэрацыі і падпісаць прэзыдэнт Расеі.
Супраць прыняцьця законапраекту выступалі праваабарончыя арганізацыі. Экспэрты лічаць, што забарона на транспераход можа прывесьці да росту колькасьці псыхічных разладаў і суіцыдаў.
- Са сьнежня 2022 года ў Расеі забаронена распаўсюджваць пазытыўную інфармацыю пра гомасэксуальнасьць, бісэксуальнасьць і трансгендэрнасьць. За гэта прадугледжаныя штрафы да 400 тысяч рублёў для грамадзян і да пяці мільёнаў рублёў для арганізацый.
