Сацыяльная сетка «ЯRUS», якая існавала з 2019 году на грошы кіраўніка ПВК «Вагнэр» Яўгенія Прыгожына, аб’явіла аб спыненьні сваёй працы.
Як пазначана ў паведамленьні адміністрацыі сацсеткі, прычынай стала «нестабільная палітычная сытуацыя», у сувязі зь якой спынілася фінансавая падтрымка праекту.
«Мы знаходзімся ў пошуку новых інвэстараў», — гаворыцца таксама ў паведамленьні.
Выданьне The Insider нагадвае, што праект «ЯRUS» задумваўся як «патрыятычны аналяг» Instagram і TikTok. У 2021 годзе Прыгожын укладваў у яго ад 30 да 40 мільёнаў расейскіх рублёў (каля 470 тыс. даляраў) на месяц. Тым ня менш папулярнай сацсетка ня стала: у ёй амаль не было рэальных карыстальнікаў, а кантэнт капіяваўся зь іншых плятформаў.
Раней Раскамнагляд заблякаваў некалькі СМІ, якія належаць Прыгожыну, у тым ліку галоўны мэдыярэсурс бізнэсоўца «РИА ФАН».
Супрацоўнікі прыгожынскіх кампаній расказалі выданьню The Bell, што неўзабаве чакаюць зьмены ўладальніка.
