Парэшткі Зьмітрака Бядулі перавезьлі з Казахстану, дзе ён памёр у эвакуацыі 3 лістапада 1941 году. Тады многіх абурыла, што над магілай габрэя Бядулі паставілі праваслаўны крыж.
Праект помніка паказаў тэлеканал АНТ, паведаміў тэлеграм-канал «Спадчына».
Скульптар Сяргей Гумілеўскі сказаў, што помнік будзе ў выглядзе асымэтрычнай пліты з дарагога зялёнага граніту, якая па форме нагадвае ніву пад парывам ветру, на пліце — бронзавая скульптурная выява паэта ў час паэтычнага роздуму. Падыход да помніка прапануецца зрабіць з брукаванкі, што сымбалізуе складаны жыцьцёвы шлях Бядулі. Вышыня помніка 180 см — такое абмежаваньне вызначана законам аб пахаваньнях.
Дзяржаўны музэй гісторыі беларускай літаратуры яшчэ ў 2021 годзе адкрыў дабрачынны рахунак для збору на помнік.
Зьмітрок Бядуля (сапраўднае імя Самуіл Плаўнік) нарадзіўся ў 1886 годзе. Беларускі празаік, паэт, мовазнаўца. Найбольш вядомы апавяданьнямі. Перакладаў на беларускую мовы творы Шолам-Алейхема, Тараса Шаўчэнкі. Памёр у 1941 годзе.
Бядуля памёр 3 лістапада 1941 году ў эвакуацыі і быў пахаваны ў казахстанскім горадзе Ўральску. Сын пісьменьніка Яфім Плаўнік расказаў, што было шэсьць спробаў перавезьці прах бацькі на радзіму ў Беларусь, і толькі на сёмы раз гэта ўдалося.
