Паводле апублікаваных матэрыялаў, колькасьць палітзьняволеных дзеячаў культуры склала 108 чалавек, прымусова зьліквідавалі 74 арганізацыі культурнай накіраванасьці.
«Сярод фактаў 1004 парушэньні супраць 518 дзеячаў культуры і асоб, 217 парушэньняў супраць 185 культурных арганізацый і супольнасьцяў, 113 — у адносінах да аб’ектаў гісторыка-культурнай спадчыны ці беларускай мовы», — гаворыцца ў матэрыялах маніторынгу.
Аўтары дакумэнта таксама ўключылі ў агульны ўлік 56 матэрыялаў, якія зьмяшчаюць кантэнт на культурную тэматыку (сайты, youtube-каналы, артыкулы, кліпы, кнігі) або датычаць дзеячоў культуры (старонкі ў сацыяльных сетках), уключаных Міністэрствам інфармацыі Беларусі ў сьпіс экстрэмісцкіх.
Сярод кірункаў парушэньняў правоў аўтары справаздачы адзначылі
- цэнзуру і адміністрацыйныя перашкоды,
- «нечалавечыя ўмовы ўтрыманьня ў зьняволеньні і практыку ўзмацненьня жорсткасьці рэжыму»,
- перасьлед за антываенную пазыцыю і падтрымку Ўкраіны,
- задушэньне іншадумства і любых формаў выказваньня думак пад выглядам барацьбы з экстрэмізмам і тэрарызмам,
- прапаганду варожасьці,
- «ціск на ўсё нацыянальнае, русыфікацыю і прасоўваньне «русскога мира».
