Навіны палітвязьняў: асуджаных лідэраў АГП перавялі зь менскага СІЗА; былога журналіста «прэзыдэнцкага пулу» прызналі палітзьняволеным

Лідэраў АГП перавялі ў СІЗА

Палітзьняволеных Антаніну Кавалёву, Аксану Аляксееву і Дзіяну Чарнушыну перавялі ў СІЗА-3 у Гомлі, паведамляе прэс-служба АГП. Андрусь Асмалоўскі — у СІЗА-6 у Баранавічах.

Усе яны чакаюць вынікаў абскарджання прысудаў, якія дагэтуль яшчэ не ўступілі ў сілу.

Лідэр партыі АГП Мікалай Казлоў увязьнены ў следчай турме № 4 у Магілёве. Артур Смалякоў — у СІЗА-2 у Віцебску.

Даты разгляду скаргаў на іх прысуды яшчэ не прызначаны.

3 лістапада суд Першамайскага раёну Менску вынес выракі траім прадстаўнікам Аб’яднанай грамадзянскай партыі:

• Мікалаю Казлову — 2,5 года калёніі,
• Аксане Аляксеевай — 1,5 года калёніі,
• Антаніне Кавалёвай —1 год калёніі.

Казлова, Аляксееву і Кавалёву затрымалі 27 ліпеня, ад таго часу яны знаходзяцца ў СІЗА № 1. Палітвязьняў абвінавачваюць ва ўдзеле ў «Маршы новай Беларусі» ў Менску ў 2020 годзе (арт. 342 КК, «актыўны ўдзел у дзеяньнях, што груба парушаюць грамадзкі парадак»).

Мікалай Казлоў на судзе завяіў, што не разумее, у чым яго абвінавачваюць, бо гэта сумесь «дзіўнай лёгікі і нястрымнай фантазіі». На пытаньне суду, ці прызнае сваю віну, ён адказаў: «Я прызнаю сябе больш пацярпелым, чым вінаватым». Кавалёва прызнала сваю віну часткова, Аляксеева — цалкам.

АГП — адна з найстарэйшых апазыцыйных партыяў Беларусі, існуе з 1995 году.

ГЛЯДЗІЦЕ ТАКСАМА:

«Справа заведзена незаконна, я буду рэабілітаваны». Лідэрам АГП прысудзілі да 2,5 года турмы

Журналіста Дзьмітрыя Семчанку прызналі палітычным зьняволеным

Дзьмiтры – журналіст і тэлевядоўца, які раней займаў пасаду ў частцы «прэзыдэнцкага пулу» тэлеканалу АНТ. У жніўні 2020 на знак пратэсту супраць жорсткіх разгонаў мірных акцый Семчанка звольніўся. У верасьні 2020 Дзьмiтрыя асудзілі за ўдзел у маршы пратэсту і далі 15 сутак адміністрацыйнага арышту, нагадвае «Вясна».

Пазьней супраць яго распачалі крымінальную справу па ч. 1 арт. 130 КК РБ («распальваньне сацыяльнай варожасьці ці варажнечы»). Артыкул прадугледжвае максымальную санкцыю ў выглядзе пазбаўленьня волі на тэрмін да пяці гадоў.

ГЛЯДЗІЦЕ ТАКСАМА:

Пракуратура пацьвердзіла крымінальную справу супраць экс-журналіста АНТ Семчанкі

Палітзьняволенага Дзяніса Івашына паставілі на ўлік як схільнага да экстрэмізму

Аўтара «Новага часу» і журналіста-расьсьледавальніка Дзяніса Івашына паставілі на прафіляктычны ўлік як схільнага да экстрэмізму.

Раней Івашына асудзілі да 13 гадоў і 1 месяца калёніі ва ўмовах узмоцненага рэжыму.

ГЛЯДЗІЦЕ ТАКСАМА:

Навіны палітвязьняў: у Івашына падчас ператрусу ў камэры забралі паліто, ручнік і фота жонкі