Як мінімум тром зь іх Шайгу выказаў занепакоенасьць у сувязі з магчымым ужываньнем Украінай «бруднай бомбы».
Міністар абароны РФ Сяргей Шайгу, пэўна, спрабаваў запаволіць або спыніць заходнюю вайсковую дапамогу Ўкраіне і аслабіць альянс NATO падчас учорашніх тэлефонных размоў з чатырма міністрамі абароны альянсу (ЗША, Вялікай Брытаніі, Францыі, Турэччыны), піша амэрыканскі Інстытут вывучэньня вайны (ISW).
Заявы Шайгу ў ISW назвалі запалохваньнем на фоне ваенных няўдач Масквы на полі бою і заўважылі, што яны зьяўляюцца працягам старажытнай інфармацыйнай кампаніі Расеі.
Па словах дасьледнікаў, расейскія дзяржаўныя СМІ распаўсюдзілі «гэтую лжывую і сьмешную заяву», а прадстаўнікі Злучаных Штатаў, Вялікай Брытаніі і Ўкраіны катэгарычна абверглі і асудзілі лжывыя абвінавачваньні. Прадстаўнікі Францыі і Турэччыны не рабілі заяў у момант публікацыі справаздачы, адзнанчае ISW.
«Крэмль неаднаразова заяўляў, што заходнія дзяржавы дапамогуць Украіне правесьці атаку з ужываньнем зброі масавай паразы пад чужым сьцягам, зь першых этапаў уварваньня ва Ўкраіну ў лютым. У красавіку Міністэрства абароны Расеі заявіла, што валодае інфармацыяй аб тым, што ЗША «рыхтуюць правакацыі для абвінавачаньня ўзброеных сіл Расеі ў прымяненьні хімічнай, біялягічнай або тактычнай ядзернай зброі. У сваім выступе перад уварваньнем 24 лютага Пуцін заявіў, што Ўкраіна рыхтуецца да ядзернага нападу на Расею, а расейскія дзяржаўныя СМІ неаднаразова сьцьвярджалі, што заходнія дзяржавы падтрымліваюць распрацоўку Украінай ядзернай зброі і плянуюць атакі пад чужым сьцягам», — гаворыцца ў справаздачы.
У той жа час, дасьледчыкі гавораць, што наўрад ці Крэмль рыхтуе непазьбежны бомбавы ўдар пад фальшывым сьцягам.
Раней расейскія ўлады неаднаразова пагражалі прымяніць «усе наяўныя сродкі», каб абараніць «сувэрэнітэт і цэласнасьць РФ».
«Заявы Шайгу, пэўна, таксама не прадвяшчаюць падрыхтоўкі Расеі прымяніць ва Ўкраіне нестратэгічную ядзерную зброю... Такія атакі наўрад ці прымусяць Украіну або Захад здацца, паколькі ўкраінскі ўрад і народ неаднаразова дэманстравалі сваю волю працягваць барацьбу, а Захаду будзе вельмі складана проста здацца ва ўмовах такіх жудасных дзеяньняў праз прэцэдэнт, які б стварыла такая капітуляцыя», — заяўляюць аўтары справаздачы.
Расейскія абвінавачваньні ў адрас Украіны прагучалі на фоне паведамленьняў, што расейскія войскі могуць пакінуць правабярэжную частку Херсонскай вобласьці. Камандуючы расейскімі войскамі ва Ўкраіне генэрал Сяргей Суравікін заявіў аб магчымасьці «няпростых рашэньняў». Некаторыя камэнтатары лічаць, што ён меў на ўвазе пакіданьне Херсона, але ёсьць і тыя, хто ўбачылі ў яго словах сыгнал аб гатоўнасьці прымяненьня ядзернай зброі.
«Брудная бомба» — выбуховае прыстасаваньне, якое складаецца з кантэйнэра з радыяактыўным ізатопам і зарадау выбуховага рэчыва. Пры падрыве зараду кантэйнэр зь ізатопамі разбураецца і радыяактыўнае рэчыва распыляецца ўдарнай хваляй на вялікай плошчы.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
