Хоць 17 верасьня, на якое ўлады прызначылі афіцыйнае сьвята «Дзень народнага адзінства», ужо прайшло, Лукашэнка накіраваў у Палату прадстаўнікоў законапраект аб амністыі, прымеркаваны менавіта да гэтага дня. Пасьля абмеркаваньняў з палітычнымі партыямі і іншымі арганізацыямі закон могуць прыняць у двух чытаньнях.
Палітвязьняў не адпусьцяць
Але з прадстаўленага законапраекту відаць, што палітычных зьняволеных амністыя не закране. Яна ня будзе распаўсюджвацца на асуджаных паводле артыкулаў, якія праваабаронцы называюць «палітычнымі» — 130-га, 293-га, 342-га, 364-га, 368-га, 369-га, 391-га і шэрагу іншых.
Гэта значыць, што пераважная большасьць палітвязьняў ня выйдзе на волю найбліжэйшым часам.
Хто трапляе пад амністыю паводле законапраекту?
Пад амністыю трапяць зьняволеныя паводле іншых артыкулаў, калі яны:
- непаўналетнія;
- цяжарныя жанчыны;
- жанчыны і адзінокія мужчыны, якія маюць дзяцей ва ўзросьце да 18 гадоў, за выключэньнем тых, хто зрабіў злачынства ў дачыненьні да непаўналетніх;
- асобы, якія дасягнулі агульнавызначанага пэнсійнага ўзросту;
- людзі з інваліднасьцю I і II групы; асобы, хворыя на актыўную форму сухотаў і аднесеныя да I, II, V «А», V «Б» групаў дыспансэрнага ўліку; асобы, хворыя на анкалягічныя захворваньні другой, трэцяй, чацьвёртай клінічных груп; ВІЧ-інфікаваныя з 3-й і 4-й стадыямі захворваньня паводле клінічнай клясыфікацыі Сусьветнай арганізацыі аховы здароўя;
- вэтэраны баявых дзеяньняў на тэрыторыі іншых дзяржаў;
- грамадзяне, якія пацярпелі ад катастрофы на Чарнобыльскай АЭС, іншых радыяцыйных аварый;
- асобы, якія атрымалі раненьні (кантузіі), калецтвы, захворваньні пры выкананьні абавязкаў у пэрыяд вайсковай службы ў Савецкай арміі і Вайскова-марскім флёце, памежных, унутраных, чыгуначных войсках і іншых вайсковых фармаваньнях былога СССР, Узброеных сілах Рэспублікі Беларусь, іншых войсках і вайсковых фармаваньняў , створаных у адпаведнасьці з заканадаўствам, а таксама асоб, якія атрымалі раненьні (кантузіі), калецтвы, захворваньні ў сувязі з ажыцьцяўленьнем службовай дзейнасьці ў пэрыяд праходжаньня службы ў Сьледчым камітэце, Дзяржаўным камітэце судовых экспэртыз, органах унутраных спраў, фінансавых расьсьледаваньняў Камітэту дзяржаўнага кантролю, пракуратуры, органах і падразьдзяленьнях па надзвычайных сытуацыях.
Вышэйзгаданыя катэгорыі асоб вызваляць ад крымінальнай адказнасьці і спыняць папярэдняе расьсьледаваньне аб злачынствах, учыненых гэтымі асобамі да набыцьця гэтым законам моцы.
Таксама пад амністыю падпадуць:
- людзі з адтэрміноўкай выкананьня пакараньня;
- людзі з умоўным непрымяненьнем пакараньня.
Акрамя таго, вызваляць ад пакараньня асоб, што ўчынілі злачынствы, якія не нясуць вялікай грамадзкай небясьпекі і якія адносяцца да катэгорыі менш цяжкіх (наўмысныя злачынствы і злачынствы, учыненыя па неасьцярожнасьці, за якія законам прадугледжана пакараньне ў выглядзе пазбаўленьня волі на тэрмін ня больш за 2 гады або іншае больш мяккае пакараньне і наўмысныя злачынствы, за якія законам прадугледжана максымальнае пакараньне ў выглядзе пазбаўленьня волі на тэрмін ня больш за 6 гадоў, а таксама злачынствы, учыненыя па неасьцярожнасьці, за якія законам прадугледжана пакараньне ў выглядзе пазбаўленьня волі на тэрмін звыш 2 гадоў), якім прызначана пакараньне ў выглядзе абмежаваньня волі і пазбаўленьня волі.
Да каго яшчэ не прыменяць амністыі?
Акрамя палітвязьняў, на амністыю ня змогуць разьлічваць людзі, да якіх ужо прымянялася амністыя раней; асуджаныя на сьмяротнае пакараньне; небясьпечныя рэцыдывісты; бацькі, якія маюць праблемы з алімэнтамі, і іншыя катэгорыі.
На выкананьне закону аб амністыі адводзіцца паўгода.
Зікрацкі: рэжым вырашыў вызваліць месцы для палітвязьняў
Вядомы адвакат Сяргей Зікрацкі, які пасьля рэпрэсій вымушаны быў выехаць зь Беларусі, у фэйсбуку пракамэнтаваў законапраект.
«Мяркуючы па апублікаваным праекце закону аб амністыі, з двух варыянтаў — вызваліць палітвязьняў ці вызваліць месцы для палітвязьняў — рэжым выбраў другі».
