Паводле афіцыйнай інфармацыі, ён быў выкліканы паліўнай цыстэрнай, якая загарэлася і знаходзілася ў хвасьце грузавога цягніка, сьцьвярджае Крымская чыгунка.
«Лякаматыў з часткай вагонаў выведзены на станцыю Керч. Вядуцца аварыйныя працы. Прычыны здарэньня высьвятляюцца», — паведамляе ведамства.
У Нацыянальным антытэрарыстычным камітэце РФ паведамілі РБК, што на Крымскім мосьце адбыўся падрыў грузавога аўтамабіля. У выніку загарэліся сем паліўных цыстэрнаў цягніка.
Сьледчы камітэт РФ заявіў, што ў выніку выбуху на Крымскім мосьце, паводле папярэдніх зьвестак, загінулі тры чалавекі.
«Гэта, як мяркуецца, пасажыры легкавога аўтамабіля, які знаходзіўся побач з грузавіком, які падарваўся. У цяперашні час з вады ўжо паднятыя целы двух загінулых — мужчыны і жанчыны, іх асобы высьвятляюцца», — паведамляецца ў тэлеграм-канале ведамства.
На шматлікіх кадрах, якія публікуюць відавочцы ў сацыяльных сетках, бачна, што акрамя пажару на чыгуначнай ветцы маста, было разбурана дарожнае палатно. З чым гэта зьвязана, пакуль невядома.
На цяперашні момант пажар на мосьце патушылі.
У другой палове дня рух па Крымскім (Керчанскім) мосьце адкрылі для легкавых аўтамабіляў і аўтобусаў. Пра гэта паведаміў расейскі кіраўнік анэксаванага Крыму Сяргей Аксёнаў. Аксёнаў заявіў, што аўтатранспартныя сродкі будуць прапускацца на мост з праходжаньнем поўнай працэдуры агляду.
«Просім кіроўцаў грузавых фур плянаваць маршрут руху, выкарыстоўваючы Керчанскую паромную пераправу. Празь дзьве гадзіны праз праліў пачынае хадзіць паром «Керч-2», — напісаў Аксёнаў у тэлеграме.
Суднаходныя аркі мосту нібыта не пашкоджаныя. Суднаходзтва на Керчанскім праліве не спынялася, для грузавых аўтамабіляў рыхтуецца запуск паромнай пераправы праз праліў, заявілі акупацыйныя ўлады Крыму.
Прэс-сакратар прэзыдэнта Расеі Дзьмітрый Пяскоў заявіў, што прагнозаў па аднаўленьні Крымскага моста пасьля пажару пакуль няма, пры гэтым чыгуначныя зносіны з акупаваным паўвостравам спыненыя.
На запраўках у Крыме пачалі выстройвацца чэргі на выпадак, калі будзе парушана забесьпячэньне палівам, паведамляюць мясцовыя тэлеграм-каналы.
Усерасейскі саюз страхоўшчыкаў ацэньвае ўрон у 200-500 мільёнаў расейскіх рублёў, або каля 8 мільёнаў даляраў.
Сьледчы камітэт РФ завёў крымінальную справу, па якім артыкуле — не ўдакладняецца. Уладзімір Пуцін даручыў стварыць урадавую камісію для высьвятленьня прычынаў выбуху.
«Крым, мост, пачатак. Усё незаконнае павінна быць зьнішчана, усё скрадзенае павінна быць вернута Ўкраіне, усё акупаванае Расеяй павінна быць выгнана», — адрэагаваў на навіну пра пажар на Крымскім мосьце дарадца кіраўніка Офіса прэзыдэнта Міхаіл Падаляк.
Крымскі мост працягласьцю 19 км зьяўляецца самым доўгім у Эўропе. Рух легкавых аўтамабіляў і аўтобусаў па ім адкрылі ў траўні 2018 году, праезд грузавікоў — у кастрычніка 2018-га. Пасажырскія цягнікі пайшлі па чыгуначнай частцы моста ў сьнежні 2019 году.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
