Па выніках праверкі, якая адбылася на мінулым тыдні, інспэктары зафіксавалі некалькі пашкоджаньняў — у тым ліку сховішча адпрацаванага і сьвежага ядзернага паліва.
Акрамя гэтага, пашкоджаныя, паводле справаздачы МАГАТЭ, цыстэрна са змазачным маслам для турбін; комплекс паблізу будынку, дзе знаходзяцца рэактары; навучальны корпус; будынак, дзе разьмешчана аварыйная сыстэма для фізычнай абароны станцыі; а таксама кантэйнэр, у якім разьмешчана сыстэма маніторынгу ўзроўню радыяцыі.
У дакумэнце гаворыцца, што неабходна ўстанавіць вакол станцыі «зону бясьпекі». МАГАТЭ выказала гатоўнасьць неадкладна дапамагчы ў гэтым. Агенцтва заклікае спыніць абстрэлы ЗАЭС, бо гэта можа прывесьці да «ядзернага інцыдэнту».
Інспэктары МАГАТЭ прыехалі на Запароскую АЭС 1 верасьня і правялі там амаль чатыры гадзіны. Шасьцёра чальцоў місіі засталіся на станцыі да канца тыдня, двое будуць знаходзіцца там на пастаяннай аснове.
