«Справу БелаПАН» пачаў разглядаць 6 чэрвеня ў закрытым рэжыме Менскі абласны суд. Абвінавачаныя:
- Андрэй Аляксандраў, 44 гады, намесьнік дырэктара ў 2014–2018 гадах;
- Ірына Злобіна, 33 гады, дзяўчына Андрэя Аляксандрава;
- Дзьмітры Наважылаў, 49 гадоў, дырэктар БелаПАН у 2018–2021 гадах;
- Ірына Леўшына, 56 гадоў, галоўны рэдактар дырэктар БелаПАН.
Усіх чатырох беларускія праваабаронцы прызналі палітвязьнямі.
4 красавіка сёлета Генэральная пракуратура паведаміла, што Аляксандраву і Злобінай ставіцца ў віну «падрыхтоўка з 14 жніўня 2020 па 12 студзеня 2021 ня менш як 260 асоб для ўдзелу ў групавых дзеяньнях, якія груба парушаюць грамадзкі парадак, шляхам аплаты адміністрацыйных штрафаў, рахункаў за харчаваньне ў месцах утрыманьня і адбываньня адміністрацыйных арыштаў, рахункаў за паслугі адвакатаў, якія ўдзельнічаюць у адміністрацыйных і крымінальных працэсах, а таксама аказваюць іншую юрыдычную дапамогу».
Ім жа інкрымінуецца «аказаньне дапамогі замежнай арганізацыі „БАЙХЭЛП“ і яе прадстаўнікам у дзейнасьці, накіраванай на прычыненьне шкоды нацыянальнай бясьпецы Рэспублікі Беларусь».
Аляксандраву, Наважылаву і Леўшынай ставіцца ў віну «стварэньне зь ліку работнікаў ЗАТ „БЕЛАПАН“ і іншых асоб групы грамадзян, якая ў 2020–2021 гадах ажыцьцяўляла экстрэмісцкую дзейнасьць у выглядзе стварэньня і разьмяшчэньня на інтэрнэт-рэсурсах ЗАТ „БЕЛАПАН“ матэрыялаў з прыкметамі экстрэмізму, а таксама кіраваньня такім фармаваньнем».
Аляксандраву і Наважылаву інкрымінуецца «ўхіленьне ад выплаты ЗАТ „БЕЛАПАН“ падаткаў пры спрошчанай сыстэме падаткаабкладаньня за 2015–2020 гады і падаходнага падатку зь фізычных асоб за люты 2015 — красавік 2021 шляхам утойваньня, наўмыснага заніжэньня падатковай базы і ўнясеньня ў падатковыя дэклярацыі заведама ілжывых зьвестак, што пацягнула за сабой прычыненьне дзяржаве шкоды каля 450 тыс. рублёў».
- 1 лістапада 2021 году КДБ прызнаў «экстрэмісцкім фармаваньнем» «групу грамадзян зь ліку супрацоўнікаў інфармацыйнага агенцтва ЗАТ „БелаПАН“». Пра гэта стала вядома 12 лістапада. У той жа дзень, каб пазьбегнуць пагрозы перасьледу супрацоўнікаў, што заставаліся на волі, дзейнасьць БелаПАН была прыпыненая.
- «Справа БелаПАН» увасабляе тое, як незалежныя СМІ ў Беларусі «былі задушаныя» пасьля прэзыдэнцкіх выбараў 2020 году ў рамках распачатай уладамі «жорсткай кампаніі па прыгнечаньні іншадумства», заявіла дырэктар Amnesty International па Ўсходняй Эўропе і Цэнтральнай Азіі Мары Стратэрс пасьля пачатку судовага працэсу.
