«Польскі дзень» праходзіць у чэскай сталіцы з 2017 году ў фармаце грандыёзнага пікніка. Адмыслова дзеля гэтай нагоды пасольства Польшчы раз на год адкрывае маляўнічыя сады Фюрстэнбэрга, дзе яно і разьмешчана. Гэта сады пад самым Праскім Градам, звычайна туды не пускаюць.
Адсюль усяго некалькі сотняў мэтраў да каралеўскага саду, дзе 500 гадоў таму працаваў садоўнікам Францішак Скарына.
Польскія дыпляматы кажуць, што сёлета яны не маглі праігнараваць міжнародную сытуацыю. Таму было вырашана ўшанаваць гераізм украінцаў, якія змагаюцца за сваю краіну, і беларусаў, якія гераічна змагаліся ў 2020 годзе.
У беларусаў разам з украінцамі быў уласны стэнд, дзе прадстаўнікі дыяспар і нацменшасьцяў расказвалі цікаўным пра Беларусь і Ўкраіну. Там можна было пагартаць альбомы з фотаздымкамі або набыць сувэніры.
Мерапрыемства ладзіў Польскі Інстытут у Празе. Гэтая ўстанова працуе ў дзясятках краінах сьвету і папулярызуе Польшчу. Дырэктар праскай філіі Мацей Ручай за некалькі дзён на сьвята расказаў Свабодзе, чаму сёлета асобную ўвагу надалі беларусам і ўкраінцам.
«Падзеі ў Беларусі і вайна ва Ўкраіне, усе наступствы гэтага, нашмат лепш нам паказалі, што мы блізкія і патрэбныя адзін аднаму. Пра гэта ў Празе гаварыла Сьвятлана Ціханоўская, і паўтарыла пазьней у Сэйме Літвы, што „свабода Ўкраіны і Беларусі непасрэдна зьвязаная зь незалежнасьцю Літвы і Польшчы“. Гэтыя словы адлюстроўваюць і нашае адчуваньне цяперашняй сытуацыі. У Польшчы сёньня жыве вельмі шмат беларускіх і ўкраінскіх эмігрантаў і ўцекачоў, нашых гасьцей. Яны сёньня зьяўляюцца часткай польскага грамадзтва і польскіх гарадоў. Немагчыма паказваць толькі прыгожыя помнікі архітэктуры або роварныя трасы і ігнараваць самыя драматычныя падзеі апошніх гадоў, — сказаў Мацей Ручай. — Мы блізкія і як ніколі патрэбныя адзін аднаму».
Беларусы і ўкраінцы Прагі сьпявалі на Дні Польшчы свае нацыянальныя песьні.
Са сцэны перад прысутнымі выступіла прадстаўніца беларускай дыяспары Прагі Крысьціна Шыянок. Яна падзякавала Польскаму інстытуту за запрашэньне беларускай нацменшасьці ў якасьці ганаровага госьця поруч з украінскай нацменшасьцю і падзякавала Польшчы.
«З 2020 вы прымаеце беларускіх уцекачоў зь Беларусі, а цяпер і з Украіны, зьяўляючыся дэ-факта адзінай краінай ЭЗ, якая зьмяніла ўласнае заканадаўства, каб даваць дазволы на пражыванне ўкраінскім беларусам і беларускам, якія ўцякаюць ад вайны», – сказала Шыянок.
Гэта ня першы выпадак, калі Польскі Інстытут супрацоўнічае зь беларускай дыяспарай у Чэхіі. Спачатку гэтаму спрыяла пасярэдніцтва пасольства Літвы, але цяпер адносіны беспасярэднія, кажа Мацей Ручай. Ад пачатку мінулага году арганізавалі больш за дзясятак імпрэзаў з удзелам прадстаўнікоў Беларусі. Адбылася фотавыстава, прысьвечаная Канстытуцыі 3 траўня. Апрача пасольстваў Польшчы і Літвы, у яе арганізацыі ўдзельнічаў Офіс Сьвятланы Ціханоўскай. Перасоўная выстава, якая спачатку прайшла ў Празе, цяпер вандруе па чэскіх гарадах.
Пры ўдзеле Польскага Інстытуту адбыўся паказ фільму беларускага дакумэнталіста Андрэя Куцілы «Калі кветкі не маўчаць» аб пратэстах у 2020 годзе. У студзені ў адным з галоўных праскіх касьцёлаў адбылася імша ў гонар Францішка Скарыны. У ёй удзельнічалі дыпляматы з Польшчы, Літвы, чэскія афіцыйныя асобы і беларусы Чэхіі. Беларускі бел-чырвона-белы сьцяг быў вывешаны падчас імшы побач зь іншымі. Праз тыдзень пасьля суботняга пікніка на тым жа месцы пройдзе фэстываль United Islands, дзе ўкраінскія і беларускія музыкі будуць галоўнымі гасьцямі.
