У ноч з 16 на 17 траўня Расея зноў пачала актыўна наносіць ракетныя ўдары па Сумскай і Чарнігаўскай абласьцях.
Як Свабодзе паведамілі ў Дзяржаўнай памежнай службе Ўкраіны, цяпер ракеты выпускаюць з тэрыторыі Расеі, а не Беларусі, як на пачатку вайны, з 24 лютага.
У той жа час Генэральны штаб Узброеных сіл Украіны кожны дзень паведамляе, што пагроза ракетна-авіяцыйных удараў з тэрыторыі Беларусі па інфраструктурных аб’ектах Украіны застаецца.
Паводле інфармацыі памежнікаў, у раёне населенага пункту Белакапытава Сумскай вобласьці расейцы зь мінамётаў абстралялі падразьдзяленьні Дзяржаўнай памежнай службы Ўкраіны.
У якія аб’екты пацэлілі расейскія ракеты:
Сумская вобласьць, горад Ахтырка
У мірныя цывільныя аб’екты ў цэнтры горада пацэлілі пяць расейскіх ракет. Пацярпелі складзкія памяшканьні, двухпавярховы і некалькі прыватных жылых будынкаў, дзіцячы садок (яго бамбілі зь першага дня вайны). Мясцовыя ўлады паведамляюць, што ў выніку абстрэлаў раненьні атрымалі ня менш як пяць грамадзян.
Чарнігаўская вобласьць. Пасёлак Дзясна
Расейская авіяцыя атакавала навучальны цэнтар Узброеных сіл Украіны. З самалётаў скінулі ракеты. Паводле кіраўніка Чарнігаўскай абласной вайсковай адміністрацыі Вячаслава Чавуса, паводле папярэдніх зьвестак, ёсьць загінулыя і шмат параненых.
Львоўская вобласьць. Явараўскі раён
Найбуйнейшая ракетная атака на Львоўшчыну з пачатку вайны. Тры ракеты зьбілі ўкраінскія сілы супрацьпаветранай абароны. Атакавалі з акваторыі Чорнага і Касьпійскага мораў.
Удар нанесены па аб’екце інфраструктуры рэгіянальнага аддзяленьня Львоўскай чыгункі ў Явараўскім раёне. З суседніх будынкаў павыляталі шыбы. Інфармацыі аб траўмаваных ці загінулых пакуль няма.
Мікалаеў і Мікалаеўская вобласьць
Мікалаеўская гарадзкая рада паведаміла, што расейцы чарговы раз абстралялі жылыя раёны гораду і некалькі населеных пунктаў у Мікалаеўскай вобласьці. Колькасьць ракетных абстрэлаў не паведамляюць.
У выніку абстрэлаў пашкоджаныя жылыя будынкі, крамы, аўтамабілі і іншыя аб’екты інфраструктуры. Ёсьць пацярпелыя, але колькі іх, не ўдакладняюць.
Харкаўская вобласьць
Пад абстрэламі мірныя жыхары населеных пунктаў Харкаўскага і Чугуеўскага раёнаў. Улады не ўдакладняюць колькасьць пашкоджаных аб’ектаў. За апошнія суткі атрымалі раненьні 10 грамадзян і яшчэ двое загінулі.
Данецкая вобласьць
Апошні тыдзень рэгіён абстрэльваюць найбольш інтэнсіўна. Паводле абласных уладаў, у выніку абстрэлаў Ліману, Аўдзееўкі, Мар’інкі, Кліновага, Дробышава і Кацярынаўкі загінулі 9 мірных грамадзян і яшчэ 6 атрымалі раненьні.
Інфармацыі са зьнішчаных Марыюпалю і Валнавахі няма.
Луганская вобласьць
Як і Данецкая, Луганская вобласьць – цяпер эпіцэнтар баявых дзеяньняў.
Расейцы ўсё мацней атакуюць і абстрэльваюць. Найбольш дастаецца Севераданецку, які пасьля акупацыі ў 2014 годзе Луганску выконвае функцыі абласнога цэнтру.
Як паведаміў кіраўнік Луганскай абласной вайсковай адміністрацыі Сяргей Гайдай, расейцы наўмысна зьнішчаюць Севераданецкую лякарню і такім чынам «дабіваюць параненых».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпра, Кіева, Харкава, Адэсы і іншых месцаў. Дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя процілегламу боку тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ карпарацыі «Роснефть» і завод «Лукойла» ў Кстове ў Ніжагародзкай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі думку, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16–18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Дзяржаўны ўкраінскі праект «Хачу жыць», які выконвае Каардынацыйны штаб у пытаньнях абыходжаньня з ваеннапалоннымі, у красавіку 2025 году апублікаваў прозьвішчы 742 грамадзян Беларусі, якія з 2023 году ваююць супраць Украіны на баку Расеі, зь іх 96 ужо загінулі.
- 1 чэрвеня на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
