Пра гэта інфармуе DW.
Акупацыйныя ўлады Херсонскай вобласьці зьбіраюцца зьвярнуцца да прэзыдэнта Расеі Ўладзіміра Пуціна з просьбай «уключыць» рэгіён у склад Расеі, паведамляюць расейскія агенцтвы са спасылкай на «намесьніка кіраўніка вайскова-цывільнай адміністрацыі» Кірыла Стрэмавусава.
Херсонскую вобласьць Украіны, якая знаходзіцца пад кантролем расейскіх вайскоўцаў, плянуецца далучыць да Расеі без рэфэрэндуму, сказаў Стрэмавусаў. «Ніякіх ХНР на тэрыторыі Херсонскай вобласьці стварацца ня будзе, рэфэрэндумаў ня будзе. Гэта будзе адзіны ўказ на падставе звароту кіраўніцтва Херсонскай вобласьці да прэзыдэнта Расейскай Фэдэрацыі, і будзе просьба ўвесьці вобласьць у склад паўнавартаснага рэгіёну Расейскай Фэдэрацыі», — прыводзяць яго словы агенцтва.
У плянах акупацыйных уладаў «з нуля» стварыць пэнсійную і банкаўскую сыстэмы. «Украінскі бок ня дасьць рэестар пэнсіянэраў. Выбудуем банкаўскую сыстэму. Тады пяройдзем, калі зможам надзяляць людзей грамадзянствам РФ. Нікога прымушаць ня будзем», — сказаў Кірыл Стрэмавусаў.
У сваю чаргу, прэс-сакратар прэзыдэнта Расеі Дзьмітры Пяскоў заявіў, што «рашэньне аб звароце да Расеі з просьбай прыняць Херсонскую вобласьць у склад РФ павінны прымаць жыхары гэтага рэгіёну». «Гэта пытаньне, якое павінна быць дакладна і старанна выверана і ацэнена юрыстамі. Таму што, вядома, падобныя лёсавызначальныя рашэньні павінны мець абсалютна дакладную юрыдычную падаплёку, абгрунтаваньне, быць абсалютна легітымнымі так, як гэта было ў выпадку з Крымам». На ўдакладняльнае пытаньне аб рэфэрэндуме Пяскоў адказаў: «Я сказаў тое, што я хацеў сказаць. Я не казаў нічога пра рэфэрэндум».
Акупацыйныя ўлады ў Херсоне
З канца красавіка Расея, якая кантралюе Херсон, пачала прызначаць на кіраўнічыя пасады ў горадзе і вобласьці сваіх людзей. Паўнамоцтвы старшыні вобласьці расейцы перадалі Ўладзіміру Сальду — былому члену прарасейскай Партыі рэгіёнаў і да 2012 году тройчы мэру Херсону, расказаў кіраўнік вайсковай адміністрацыі вобласьці Генадзь Лагута, які пакінуў вобласьць у сакавіку.
Старшынёй Херсонскай гарадзкой адміністрацыі расейскія вайскоўцы зрабілі дэпутата Херсонскага гарсавету Аляксандра Кобца. У Офісе генэральнага пракурора Ўкраіны назвалі захоп гарсавету і зьмену кіраўніцтва вобласьці і гораду «парушэньнем мэтадаў і звычаяў вайны». Сальду і Кобцу пагражаюць абвінавачаньні ў калябарацыянізьме і дзяржаўнай здрадзе.
Абвяшчаючы 24 лютага аб уварваньні ва Ўкраіну, Уладзімір Пуцін сьцьвярджаў, што ў пляны Расеі «не ўваходзіць акупацыя ўкраінскіх тэрыторый».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
