Праверка сіл рэагаваньня Ўзброеных сілаў Беларусі не выклікае непакою ўкраінскіх уладаў. Пра гэта ў інтэрвію каналу «Фейгін Live» заявіў дарадца кіраўніка Офіса прэзыдэнта Ўкраіны Аляксей Арастовіч.
«Гэта плянавая праверка гатоўнасьці, і гэта плянавае вучэньне беларускіх узброеных сіл. (...) Ня бачым прыкмет падрыхтоўкі да наступу на Ўкраіну або ва Ўкраіну ўваходжаньня войскаў і асаблівай турботы не адчуваем», — сказаў Арастовіч.
На думку дарадцы, калі беларускія войскі ня бралі ўдзел у першым этапе расейска-ўкраінскай вайны, то цяпер гэта яшчэ менш верагодна.
«Тады ж было як: вось Кіеў штурмуюць адборныя расейскія часткі. А цяпер чаго?! Яны пойдуць без расейскіх частак? Абсалютна нерэальна. Я ня бачу нагоды хвалявацца цяпер», — дадаў Арастовіч.
Арастовіч раказаў, што, паводле ягоных дадзеных, у Беларусі застаецца «дзясятак-паўтара» расейскіх самалётаў і некалькі тактычных ракетных комплексаў.
«Гэта ўсё не наступальная „па зямлі“ зброя».
У Беларусі пачаўся другі этап раптоўнай праверкі сіл рэагаваньня. Вайсковыя манэўры заплянавалі ў адказ на вучэньні, якія з 1 траўня праходзяць на тэрыторыі краін NATO.
Аляксандар Лукашэнка 10 траўня правёў нараду пра дзяржаўную абаронную замову Беларусі на бягучы год. Пасьля гэтай нарады Міністэрства абароны выступіла з заявай.
Кіраўнік Генэральнага штабу Ўзброеных сіл, першы намесьнік міністра абароны Беларусі Віктар Гулевіч заявіў аб пачатку другога этапу праверкі сіл апэратыўнага рэагаваньня.
Паводле ягоных слоў, у рамках гэтага этапу на Заходні і Паўночна-заходні апэрацыйныя кірункі рушылі батальённа-тактычныя групы, а для іх узмацненьня — падразьдзяленьні супрацьпаветранай абароны, ракетных войскаў і артылерыі, якія будуць забясьпечваць іхнае баявое функцыянаваньне.
Паводле Гулевіча, падразьдзяленьні сіл спэцыяльных апэрацый разгарнулі на трох тактычных кірунках паўднёвага кірунку (да мяжы з Украінай. — РС).
Адначасова Міністэрства абароны Беларусі абвясьціла аб прызыве ў Берасьцейскай і Горадзенскай абласьцях з 10 траўня 430 асобаў з запасу на вайсковыя зборы тэрытарыяльнай абароны.
Тлумачачы такія рашэньні, Віктар Гулевіч заявіў, што ЗША і іх саюзьнікі нібыта нарошчваюць вайсковую прысутнасьць ля дзяржаўных межаў Беларусі.
«Створаная групоўка за апошнія 6 месяцаў вырасла больш чым у 2 разы як у колькасных, так і ў якасных адносінах. Зьяўленьне ў акваторыі Міжземнага і Балтыйскага мораў групоўкі, якая нясе крылатыя ракеты марскога і паветранага базаваньня, павелічэньне авіяцыйнай групоўкі ў краінах Польшчы і Балтыі сьведчыць пра нарастаючую пагрозу для Рэспублікі Беларусь».
Гулевіч сказаў пра вучэньні на тэрыторыі Ўсходняй і Паўднёва-Ўсходняй Эўропы. У вучэньнях «Абаронца Эўропы» мяркуецца задзейнічаць да 20 000 чалавек і вялікую колькасьць тэхнікі. Ён згадаў яшчэ 7 вучэньняў на тэрыторыі краін, якія мяжуюць зь Беларусьсю.
Згадаў Гулевіч і Ўкраіну, якая цяпер змагаецца супраць расейскай ваеннай агрэсіі:
«Створаная Ўзброенымі Сіламі Ўкраіны групоўка на Паўднёвым апэрацыйным напрамку агульнай колькасьцю да 20 000 чалавек таксама патрабуе ад нас рэакцыі. З мэтай забесьпячэньня бясьпекі Рэспублікі Беларусь на Паўднёвым напрамку сілы падразьдзяленьняў сіл спэцыяльных апэрацый разгорнутыя на трох тактычных напрамках».
4 траўня пасьля размовы Лукашэнкі і Пуціна Мінабароны Беларусі пачало раптоўную праверку сіл рэагаваньня. Пра гэта паведаміла Мінабароны Беларусі.
Што было пасьля ранейшых вучэньняў
Мінулыя маштабныя вучэньні «Саюзная рашучасьць — 2022» — сумесныя вучэньні Ўзброеных сіл Расеі і Рэспублікі Беларусь — прайшлі з 10 па 20 лютага 2022 году. Праз чатыры дні расейская армія з тэрыторыі Беларусі ўварвалася ва Ўкраіну.
Беларуская армія тады ў нападзе непасрэдна ня ўдзельнічала, абмежавалася выкананьнем тылавых функцый. Масква разьлічвала захапіць краіну і зьліквідаваць украінскую дзяржаўнасьць за некалькі дзён. Аднак расейскія войскі былі адкінутыя ад Кіева і Харкава, іх атака была спыненая пад Мікалаевам.
Учора адбылася тэлефонная размова Ўладзіміра Пуціна і Аляксандра Лукашэнкі.
Беларусь дазволіла Расеі скарыстаць сваю тэрыторыю для нападаў на Ўкраіну з поўначы; расейцы выкарыстоўваюць беларускія аэрадромы для палётаў і беларускія пляцоўкі для ракетных абстрэлаў гарадоў Украіны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
