Пра новы ціск на вязьняў гавораць праваабаронцы.
Раней у палітычных «хімікаў» масавыя ператрусы праходзілі ў студзені і лютым 2022 году. 14 лютага ў сьпісе экстрэмісцкіх фармаваньняў зьявіўся тэлеграм-чат «Волейбол по выходным». Рашэньне прымала КДБ. Чат аб’ядноўваў палітвязьняў, асуджаных на «хімію», і 15 лютага супрацоўнікі КДБ пачалі «зачыстку».
Затрыманьні, ператрусы, допыты, забіраньне тэлефонаў на экспэртызу ў палітвязьняў праходзілі ў 8 папраўчых установах. Таксама прайшлі ператрусы па месцы жыхарства асуджаных на «хімію» палітвязьняў, якія пакінулі Беларусь.
Пасьля «рэйду» двух палітвязьняў перавялі ў СІЗА-3 і распачалі супраць іх новую крымінальную справу.
Што такое «хімія» і «хатняя хімія»
«Хімія» — адбыцьцё пакараньня абмежаваньнем волі ў папраўчай установе адкрытага тыпу. Выраз зьявіўся ў СССР у пасьляваенныя часы, калі працу асуджаных пачалі актыўна выкарыстоўваць на будоўлях і шкодных вытворчасьцях (у тым ліку на хімічных прадпрыемствах). У Беларусі 29 папраўчых установаў адкрытага тыпу, або «хіміяў».
Праз пакараньне «хіміяй» прайшоў шмат хто зь беларускіх апазыцыянэраў.
«Да мяне маглі прыяжджаць наведнікі, мы сустракаліся і размаўлялі ў дворыку спэцкамэндатуры. Карыстаўся мабільным тэлефонам, даходзілі лісты, я пісаў з „хіміі“ нататкі... Некалькі разоў дазвалялі зьезьдзіць да бацькоў», — згадваў Павал Севярынец пра сваю «хімію» ў Пружанскім раёне, дзе працаваў на складзе мясцовай гаспадаркі.
«Хіміяй» часта заканчваюцца адседкі вязьняў, якія былі асуджаныя на вялікія тэрміны зьняволеньня, але праз добрыя паводзіны заслужылі палёгку.
Пакараньне «абмежаваньнем волі» магчыма адбыць і на так званай «хатняй хіміі» — калі ў прысудзе выкарыстоўваецца фармулёўка «без накіраваньня ў папраўчую ўстанову адкрытага тыпу». Фактычна гэта сумесь «хіміі», якая прадугледжвае абавязковую прымусовую працу, і адбыцьця пакараньня з адтэрміноўкай, калі асуджаны знаходзіцца дома, але пад рэгулярным пільным кантролем міліцыі.
10 відаў няволі: гід па беларускіх турмах
