У суботу, 7 траўня памёр знакаміты шахматыст Юрый Авербах. Пра яго сьмерць паведаміла прэс-служба Фэдэрацыі шахмат Расеі.
Авербах быў найстарэйшым гросмайстрам плянэты, яму было 100 гадоў.
Яшчэ ў 1938 годзе юны шахматыст перамог ва Ўсесаюзным турніры школьнікаў. Званьне гросмайстра атрымаў у 1952 годзе, а ў 1954-м стаў чэмпіёнам СССР. У складзе зборнай СССР перамагаў на камандным чэмпіянаце Эўропы ў 1957 і 1965 гадах. Таксама ўдзельнічаў і перамагаў у мностве міжнародных турніраў.
Некалькі разоў Авербах падбіраўся вельмі блізка да вырашальнага матчу за званьне чэмпіёна сьвету. Ён двойчы (у 1952 і 1958 гадах) станавіўся ўдзельнікам міжзанальнага турніру, а ў 1953 годзе выступаў у турніры прэтэндэнтаў.
Юрый Авербах сустракаўся за дошкай з многімі чэмпіёнамі сьвету, уключна зь нідэрляндцам Максам Эйвэ, які заваяваў сусьветную шахматную карону ў 1935 годзе.
Асабліва гросмайстар славіўся як тэарэтык эндшпілю (заключнай фазы шахматнай гульні). Гросмайстар падрыхтаваў восем фундамэнтальных работ па розных тыпах эндшпілю, на якіх вучыліся шматлікія пакаленьні шахматыстаў.
Таксама Авербах уваходзіў у прэзыдыюм ФІДЭ (Міжнароднай фэдэрацыі шахмат), быў галоўным рэдактарам газэты «Шахматная Москва», часопісу «Шахматы в СССР», «Шахматного бюллетеня», працаваў намесьнікам галоўнага рэдактара энцыкляпэдычнага слоўніка «Шахматы», шмат гадоў вёў тэлеперадачу «Шахматная школа».
