Чыноўнікі ЗША і ЭЗ цяпер абмяркоўваюць магчымыя меры па абмежаваньні імпарту нафты ў Эўразьвяз з Расеі і скарачэньні прыбыткаў, якія Масква атрымлівае ад продажу сыравіны, паведамляе Bloomberg са спасылкай на ананімныя крыніцы.
Варыянты, якія абмяркоўваюцца, уключаюць
- поўную забарону паставак,
- устанаўленьне цэнавага парогу,
- выкарыстаньне разьліковага мэханізму, які дазволіць утрымаць выручку Расеі, атрыманую з пачатку вайны ва Ўкраіне.
Па словах адной з крыніц Bloomberg, мэта перамоваў — высьветліць, які «максымальна моцны ўдар» можна нанесьці па прэзыдэнту Расеі Пуціну.
Адно з апасеньняў ЗША заключаецца ў тым, што забарона на імпарт нафты ў ЭЗ можа прывесьці да рэзкага росту цэнаў на сыравіну і прынесьці Крамлю яшчэ больш даходаў.
Як сьцьвярджаюць крыніцы выданьня, Эўразьвяз можа вылучыць прапановы для абмеркаваньня краінам ЭЗ ужо на наступным тыдні. На думку аднаго з суразмоўцаў Bloomberg, краінам ЭЗ будзе прасьцей дасягнуць кансэнсусу адносна абмежаваньня імпарту нафты, чым па эмбарга на дызэльнае паліва і іншую прадукцыю.
Большасьць краін Эўразьвязу прымаюць меры па скарачэньні імпарту расейскіх энэрганосьбітаў, каб абмежаваць магчымасьці Крамля фінансаваць вайну. Адназначна адмаўляецца зрабіць гэта толькі Вугоршчына.
Раней эмбарга ўвялі ЗША і Вялікая Брытанія, якія спажывалі значна менш расейскай нафты, чым Эўразьвяз.